■ SEMENTERYO:

Gisugdan na og hawan ang tulo ka ektaryang luna sa sityo Catives, Barangay Guba, Dakbayan sa Sugbo aron himuon nga sementeryo sa Siyudad taliwa sa coronavirus disease (Covid-19). Apan ang Siyudad gibaraw sa Department of Environment and Natural Resources (DENR) tungod sa pagpamutol sa mga kahoy.

Giuyonan sa mga barangay kapitan sa bukid ang katukoran sa Cebu City Botanical Garden Cemetery sa Barangay Guba, Dakbayan sa Sugbo.

Kini human sa gipahigayon nga meeting sa lima ka mga punong barangay gikan sa Agsungot, Guba, Sirao, Cambinocot, ug Paril niadtong Hulyo 8 uban sa mga opisyal sa Deparment of Environment and Natural Resources (DENR) ug Inter-Agency Task Force (IATF)

Si Kapitan Peter Dumaolao sa Barangay Agsungot, kansang lugar maoy agianan sa mga patay nga dad-on gikan sa siyudad, nagkanayon nga pabor sila human nahatagan og katin-awan ang ilang kabalaka sa coronavirus disease (Covid-19).

“Wala natay mahimo pa kay puno naman ang mga menteryo sa siyudad. Naa man gani apan mahal kaayo ang private P130,000. So, kami sa lima ka barangay, okay na lang mi kay matod pa ni Konsehal Tumulak nga safe ug sealed man ang mga Covid casualties nga ilubong sa maong menteryo,” pasabot ni Dumaolao, kansang baranggay sikit ra sa Catives.

Gawas ni Dumaolao, didto usab si kagawad Adonis Atuel sa Cambinocot, Kapitan Flaviano Gabunada sa Sirao, Orland Herrera sa Guba ug Neresa Doncillo sa Paril.

Si Konsehal Dave Tumulak maoy gitahasan ni Mayor Edgardo Labella para sa katukoran sa maong sementeryo sanglit puno-puno na ang mga dagkong sam-ang nga nahimutang sa siyudad.

Si Tumulak nagkanayon nga pasiunang giuyonan sa DENR ang pagputol sa gagmay nga mga kahoy para sa katukoran sa sementeryo sanglit nakita ang panginahanglan niini gumikan sa casualties sa Covid-19.

“Atong nakompirmar gikan mismo sa atong City Administrator nga adunay pagtugot ang pagputol sa maong mga kahoy. Iyang gitawagan si Mr. Pasoc sa DENR ug mihatag kini og pagtugot kining mga gagmay nga kahoy nga anaa sa sityo Catives sa Barangay

Guba,” padayag ni Tumulak.

Wa hinuon maklaro kon apil ba sa pagtugot ang mga punoan sa mahogany. Ang DENR nisakmit sa kapin sa 300 ka mga punoan sa mahogany kay way permit sa pagputol.

Si Eddie Llamedo, Chief Planning ang Management Division sa DENR 7,niingon nga ang buhatan niluwat og notice of violation sa Siyudad sa Sugbo sa Hulyo 10, 2020. Gisakmit usab sa DENR ang mga kahoy.

Nipasabot si Llamedo nga ang notice of violation giluwatan aron paghatag sa Siyudad og higayon sa pagtuman sa rekisitos.

Matod niya nga dunay administrative adjudication proceedings nga gitakda aron matubag ang mga isyu sa kalikupan.