Namati ka ba?

May kalahian ba ang pagdungog, pagpaminaw, ug pagpamati? Kining tulo ka punglihok kun “verbs” kon hubaron ngadto sa ininglis “to listen”. Sumala pa sa usa nako ka amigo, ang “pagpamati” kuno mao ang papaminaw nga inubanan og pagbati. Mao kuno ni ang labing lalom nga pagpaminaw. Ang pagdungog man god mahimong ang nadawat sa dalunggan mao ang kasigas, saba, banha, gahub o nadungog lang ang bagting, tagingting, o tagaktak. Dili kini mistil hatagan og kahulogan. Mas makahuloganon na ang pagpaminaw kay gihubad na ang nadungog, gipangitaan na og kahulogan.

“Ang adunay dalunggan, papamatia,” nagkanayon si Jesus human siya magtudlo sa sambingay sa Magpupugas. Gitandi sa sambingay ang gingharian sa langit ngadto sa binhi nga gipugas. Daghang matang sa yuta nga nahimong babag sa pagturok o pagtubo sa mga liso. Apan makapahingangha ang abot sa tabunok nga yuta kay milapas kini sa mahimo sa tawo. Mao nga “ang adunay dalunggan, papamatia” kay mahimong daghan kaayo tag kisaw apan wala tay bunga.

Kon subayon nato ang pipila ka mga yugto sa ebanghelyo nga diin migawas ang mando sa pagpaminaw, makita nato nga tawag kini sa pagkakabig ug paghatag sa tibuok natong kaugalingon sa kabubut-on sa Dios. Makita ni nato sa sambingay sa sagbot nga adunay katapusang paghukom. Dili duwa-duwa ang pagsunod sa Dios. Kini sang asin nga mawadan sa kaparat nga wala na kini kapuslanan, makusganon nga tawag kini sa pagpuyo nga tinuoray

Binasi sa Isaias 55:10-11; Salmo 65; Taga-Roma 8:18-23; Mateo 13:1-9 sa atong pagkamagtutuo. Dili ni tiawtiaw.

Mabasa pod ang susamang mando diha sa libro sa Gipadayag. Human makighinabi si Jesus sa pito ka mga lokal nga simbahan sa Asia Minore, ang iyang panapos mao: “Ang adunay dalunggan papaminawa siya sa gisulti sa Espiritu ngadto sa mga simbahan”. Human niya sila sultii sa ilang tinuoray nga kahimtang atubangan sa Dios ug mandoi sa pagbag-o sa ilang buhat, gipahamtang niya kanila ang tawag sa pagkakabig. Kon ang ilang pagpaminaw inubanan og pagbati, maaninaw nila nga ang nagpaluyo sa bug-at nga panawagan mao ang Dios nga makatarunganon ug maluluy-on.

Gitandi ni propeta Isaias ang kinaiya sa ulan nga mahulog gikan sa langit ngadto sa pulong sa Dios nga dili mobalik sa Ginoo nga walay epekto kondili tumanon niini ang kabubut-on sa Dios. Angay ning dugtongon sa mando nga “ang adunay dalunggan, papamatia” kay lisod ning mawala sa passing, labaw na gayod sa plano sa Dios nga mahibaloan lamang pinaagi sa pagpaminaw.

Niining paagiha lamang nato mahatagan og kahupayan ang “agulo” nga gihisgotan ni San Pablo ngadto sa mga taga-Roma. Ang kinaiyahan ug ang kamugnaan “nagabati” hangtod matawo kini pag-usab samtang hingpiton ang proseso sa pagbalik sa tawo ngadto sa Dios. Sa kasamtangang panahon, mahimong madungog lamang nato ang agulo sa atong mga pag-antos. Kinahanglan pamation pod nato ang mensahe sa Dios alang kanato taliwala sa atong mga pag-antos.

Maantigo ba kitang mamati o hangtod lang kita sa pagdungog?