Pagbalik sa boxing sa Sugbo

Human gilakip sa Inter-Agency Task Force (IATF) ang professional boxing sa mga sports nga mahimo nang hinayhinay nga makabalik taliwala ning nagpadayon nga coronavirus disease (Covid-19) pandemic, gibati na og kahinam karon ang Omega Pro Sports International (OPSI) nga makapahigayon og boxing promotion.

Kon way kausaban posibling ang Opsi maoy unang maka-promote og professional boxing sa tibuok nasod o kaha sa Central Visayas.

Niadto pa diayng Hunyo nakahan-ay ang Opsi og card alang sa ilang boxing promotion nga kon sa higayon maaprobahan na ang pagpahigayon sa pro boxing, anaa dayon silay ikapresentar.

"Actually, June palang nag ready nami sa card namo. Including protocols in the venue, rapid or pcr testing if necessary. We are studying other promotional outfit like Top Rank on how they promote at this pandemic situation, maybe we could get some points that is applicable here in the Philippines para molihok nani boxing nato. Ang last say man jud ani IATF and GAB," matod ni Julius Erving Junco, ang head trainer sa Omega Boxing Gym.

Matod ni Junco nga duna silay walo ka mga boxers nga nagpadayon sa ilang training bisan pa man sa pandemia ug anaa na kini sa saktong kondisyon nga maoy ilang paawayon.

Ibutang nila sa main event mao ang ilang pambato nga si Pete Apolinar kinsa mosuway sa katakos sa beteranong si Marco Demecillo. Laing pito ka parisan ang modugang sa kaikag sa maong promosyon.

Ilang plano nga mga Cebu-based fighters ang ilang ikontra sa ilang mga fighters para dili lisod ang biyahe.

Iya usab nga gibutyag nga andam silang mogasto aron pag-obserbar ug pagsunod sa mga protocols nga gilagda sa IATF. Kini sama sa pagpa swab test sa nga boksidor, trainer/ cornerman ug mga referees.

Gawas sa swab test, istrikto usab nilang ipasunod ang pagsul-ob og mask, social distancing ug disinfecting sa venue ug mga kagamitan. Kon unsay gihimo sa Top Rank Promotion didto sa Las Vegas, hayan mao usab kini ang ilang sundogon.

Labaw sa tanan, ang mga boxers moaway nga dili makadungog og abiba sa ilang mga dumadapig kay wala may mga audience nga makasulod sa venue. Hinuon adunay ipahigayon nga live streaming.

Gibutyag ni Junco nga ang ilang target date mao ang buwan sa Agusto o sa Septiyembre.

Adto kini nila ipahigayon sa dakong hawanan sa bagong planta sa International Pharmaceutical Inc. (IPI) sa Tingub-Mandaue. Hinuon kining tanang plano mag-agad ra gyud sa sitwasyon kalabot niining nagpadayon nga hulga sa coronavirus disease.

Sa pagkakaron, ang Mandaue ubos pa sa general community quarantine (GCQ) nga status, diin sigon sa atong panukiduki, dili pa tugotan nga makapahigayon og sporting events hangtod nga ma-elevate na kini ngadto sa modified GCQ.

Atong gihangop kining plano sa Opsi. Hinaot nga buligan kini sa kahigayonan, kay gawas nga makapahupay kini sa mga tawo taliwala sa dakong hulga nga giatubang, makatabang usab kini sa mga boksidor nga taodtaod na nga nawad-an sa ilang income. Goodluck, guys. jun.migallen22@gmail.com.