Pro boxing pwede na: IATF

Makabalik na unya ang mga boksidor sa ilang training human gitugotan sa InterAgency Task Force (IATF) ang professional boxing sa mga lugar nga gipaubos na sa modified general community quarantine (MGCQ).

Gianunsiyo ni Games and Amusements Board (GAB) chairman Baham Mitra niadtong Biyernes nga gilakip sa shortlist ang professional boxing human sila mo-appeal sa Department of Health (DOH) ug IATF.

Niadtong miaging semana, gitugotan na makabalik sa training ang mga pro nga atleta sa Philippine Basketball Association (PBA) ug Philippine Football League.

Matod ni Mitra sama sa basketball ug football, ang professional boxers lamang ang tugotan mga mo-resume sa ilang training sa MGCQ areas ug kini malagmit pwede masugdan karong Agusto.

Ang boxing, usa sa pinakasikat nga sports sa Pilipinas, nahunong tungod sa coronavirus disease (Covid-19) pandemic. Naghinaot ang mga boksidor, trainers ug promoters nga malakip na kini sa tugotan sa “new normal”.

Si Mitra nagkanayon nga tungod sa health concern sa boxing, wala kini maapil sa listahan sa DOH sa unang proposal diin gitugotan ang football ug basketball. Pero sa bag-ong IATF meeting, si Department of the Interior and Local Government (DILG) ug si Deparment of Labor and Employment Silvestre Bello III nangusog sa paglakip sa pro boxing kauban sa basketball ug football.

“Boxing included in areas under MGCQ, provided testing and quarantine protocols are followed, and provided that it will be included in Joint Administrative Order,” matod ni Health Undersecretary Dr. Maria Rosario Vergeire sa report sa The Manila Times.

Usa sa gahinam-hinam na nga mabalik ang pro boxing mao ang Sugbuanong si Jhack “El Kapitan” Tepora, kinsa gaplano nga mosaka sa super featherweight division sa iyang sunod nga mga away.

Si Tepora (23, 17KOs, 1) nagpanikad nga makabawi human siya nakatilaw sa iyang pinaka-unang pilde sa kamot ni Oscar Escandon sa Toyota Center Arena in California niadtong Disyembre.