Wala tawon ko ma-Covid
Ako lang ning klaruhon ha. Kini nunot sa daghang personal nga mga pangutana kon asa na ko gumikan kay wala man ako madungog sa akong inadlaw nga programa sa radyo, dySS Super Radyo ug wala usab ako makita sa akong inadlaw nga newscast sa GMA 7 Cebu Balitang Bisdak. Duna man gani mikatap nga “tsismis” nga na-Covid kuno ko mao nga absent ako sa akong mga tulumanon sa radyo ug telebisyon.
Dili tinuod intawon ang maong balita nga na-Covid ko. Fake news to. Mga duha ka tuig na ang nakalabay, nabalita man gani nga giatake ko sa kasing-kasing ug namatay yud. Dili diay. Lain tong “Bobby” nga miyembero sa Dos Kumpadres ang giataki ug namatay. Unya ang unang nikatap nga balita nga ako. Puwerteng daghanang nanawag nako. Nahibulong gud sila nga “namatay” na apan mitubag pa gihapon. (Hehe.)
Wala pa tawon ko ma-Covid ha. Migamit kog “wala pa tawon” kay dili man kita makasiguro ning sakita. Kay bisan unsaon nato og matngon, puwede man gihapon tang matakbuyan. Natakbuyan man gani ang inilang mga tawo. Mga presidente, mga hari, Cabinet members ug mga senador, kita pa kaha? Dili man god nato makita ang virus.
Ang estorya mao ni: giubo lang ko niadtong duha na ka semana ang nakalabay. Unya napagaw pa yud. Kining pagaw mao ni kontra nga sakit sa mga magsisibya kay bati ug lain paminawon ang imong tingog sa kahanginan kon pagaw ka. Kanang ubo ordinaryo ra man god na. Apan karon dako na kaayo nang isyu kay kon ubhon ka, Covid ka dayon kay usa lagi sa mga symptom. Kaniadto, kon mangutot ka, dunganan nimog ubo aron dili maklaro. Karon, kon moubo ka, dunganan og utot aron dili maklaro.
Gumikan sa akong pagaw, midesider na lang ko nga mo-file og leave of absence ug mibulontaryo sa pagpa-quarantine og 14 ka adlaw. Daghan pa kog mga hospital leave credits nga wala magamit. Mawala naman ang virus human sa 14 ka adlaw ug dili ka na makatakod. Kay kon naigo pa ko sa Covid, sigurado nga hospital ko karon kay naa koy mga daang sakit sama sa hypertension ug diabetes. Salamat sa mga nagpakabana ug sa nagpakatap sa “tsismis” nga na-Covid ko. Basin mobalik na ko og programa sa radyo karong adlawa.
(bobbygnalzaro@gmail.com)