Cesafi webinar sundan dayon og laing espisode

Human sa malampuson nga unang hugna sa Cebu Schools Athletic Foundation Inc. (Cesafi) Sports & Coaching Webinar Series, sundan dayon kini og lain nga episode kauban si Association of Boxing Alliances in the Philippines (ABAP) secretary-general Ed Picson.

Ang ikaduhang hugna sa series buhaton sa Google Zoom ug makita live sa Facebook karong Sabado, Agosto 8, 2020 alas 3:00 sa hapon kauban ang hosts ug fitness coaches nga sila si Pio Solon ug Paulo Agir.

Matod ni Solon nga usa sa ilang mga hisgutan mao ang mga naagian sa ABAP ug giunsa nila pagkahimong usa sa mga labing malambuon nga national sports association (NSAs) sa Pilipinas.

“I think the lessons that could be learned are instrumental for sports administrators and coaches in building a world class program,” matod ni Solon, kinsa athletic director sab sa Southwestern University (SWU-Phinma).

“Hopefully our participants will understand what it takes to run progressive sports organizations.”

Ilaha pud tukion kon giunsa pagpalapad sa ABAP ang ilang programa sa boksing.

“How it has grown under his leadership. If you remember in 2012 only one boxer qualified for the Olympics, in 2016 we had two, and now we already have three, and qualifying isn’t finished yet,” sigon ni Solon.

Ang program head sa Magna Anima Sports and Physical Education Program nga si Sebastian Repoll maoy unang guest sa matag semana nga online seminar.

Si Olympic silver medalist Hidilyn Diaz ug University of the Philippines (UP) Fighting Maroons head coach Bo Perasol nahilakip sa umaabot nga guests sa Webinar.