JUMPER NI BOOKER MITIPI SA CLIPPERS
Napasulod ni Devin Booker ang iyang buzzer-beater turnaround jumper atubangan sa depensa ni Paul George aron agakon ang Phoenix Suns ngadto sa kulbahinam nga kadaugan batok sa Los Angeles Lakers, 117-115, kagahapon sa 2019-20 National Basketball Association (NBA) season restart sa Walt Disney World Resort.
Ang Suns wala pa’y pilde sulod sa tulo ka mga duwa gikan sa pagbalik sa aksyon sa liga ug mingsaka sa 29-39 nga rekord sa ilang padayong paggukod nga makabaton og puwesto sa playoffs.
Sa kasamtangan, ang Suns nagbitay sa ika-12 nga dapit sa Western Conference ug taastaas pa ang ilang latasunon alang sa inilugay sa ikawalo ug nahabiling puwesto sa playoffs sa ilang grupo.
Gipasabot ni Booker nga wala sila maghunahuna sa kasamtangan nilang sitwasyon ug nagtutok lang sila sa ilang matag duwa. Ang Suns aduna pa’y 12 ka mga duwa sa regular season.
“This is a fun team to be a part of and we’re having fun with it,” matod ni Booker.
“This whole experience ... we just wanted to come down here and make some noise and that’s what we’re doing.”
Ang usa sa mga pambato sa Clippers nga si Kawhi Leonard mitabla sa duwa, 115-115, sa nahabiling 31 segundos.
Human niini, nasipyat ang pointguard sa Suns nga si Ricky Rubio sa iyang itsa ug nakuha sa sakop sa Clippers nga si Ivica Zubac ang rebound.
Daling gipasa ni Zubac ang bola sa iyang kauban apan nailugan kini ni
Mikal Bridges sa nahabiling walo ka mga segundos nga maoy naghatag og laing kahigayunan sa Suns.
Una niya naitsa ang iyang nakapadaog nga turnaround jumper, si Booker milikay una sa depensa ni Leonard dayon ni George.
“I’m happy for him, but he’d be the first one to tell you we’re not done,” asoy ni Phoenix coach Monty Williams kabahin kang Booker.
Gipangulohan ni Booker ang Suns pinaagi sa iyang 35 puntos, nidugang og 19 puntos si DeAndre Jordan samtang niamot og 18 puntos si Rubio. Ang Clippers, nga nagpabilin sa ikaduhang luna sa West taliwala sa kapildihan dala ang 45-22 nga rekord, gipangulohan ni Leonard pinaagi sa iyang 27 puntos, niamot og 23 puntos si George samtang nitampo og 18 puntos si Zubac.
Sa laing kulbahinam nga kombati, nagkumboya sila si Damian Lillard ug Carmelo Anthony sa hinapos nga bahin aron agakon ang Portland TrailBlazers sa kadaugan batok sa Houston Rockets, 110-102.
Sa uban pa nga mga kombati, ningdaog ang Brooklyn Nets batok Milwaukee Bucks, 119-116, Dallas Mavericks batok Sacramento Kings, 114110, Indiana Pacers batok Orlando Magic, 120-109, ug Miami Heat batok Boston Celtics, 112-106.