RUSSIA MITANYAG OG BAKUNA

SA PILIPINAS; AMBASSADOR: ANTI COVID VACCINE GI-DEVELOP, LUWAS

Usa ka bakuna batok sa Covid-19 gi-develop na karon sa Russia ug ang Kagamhanang Ruso nisugyot og kooperasyon tali Pilipinas ug andam nga mo-suppy sa bakuna.

Si Russian Ambassador to the Philippines Igor Khovaev sa usa ka virtual presser sa Biyernes, Agusto 7, 2020, niingon nga ang gisugyot nga panagtambayayong giduso ngadto sa Philippine Government pinaagi sa Department of Foreign Affairs ning semanaha.

Siya niingon nga naghuwat lang sila sa tubag sa Kagamhanan sa Pilipinas kalabot sa kooperasyon.

Si Khovaev nipahibawo nga ang luwas ug epektibong Covid-19 nga bakuna giugmad na ug ang tanang mga pamaagi alang sa administrative approval gitakda sa tunga-tunga sa Agusto.

Matod sa Ambassador nga labing minos 20 ka kanasuran, sama sa India ug pipila ka mga nasod sa Europe, nipadayag na sa ilang kaikag sa bakuna ug opisyal nang nikompirmar sa kooperasyon.

Hinuon, si Khovaev, way klaro kon unsa nga matang sa kooperasyon tali sa 20 ka kanasuran.

Sa iyang gisugyot nga panagtambayayong tali sa Kagamhanan sa Pilipinas, duna kini tulo ka giilang mga dapit:

kooperasyon pinaagi sa clinical trials kon ang kagamhanan sa Pilipinas nanginahanglan niini supply sa bakuna lokal nga paggama sa bakuna sa Pilipinas.

“We Russians are ready to closely cooperate with partners in order to defeat Covid-19,” matod ni Khovaev.

Si Khovaev niingon nga kini ang talagsaong kahigayunan nga mopalambo og maayo sa relasyon tali sa Rusya ug Pilipinas.

Ang Rusya duna nay 875,378 Covid-19 cases sa Agusto 7, 2020. Sila ang ikaupat sa kalibutan nga dunay labing daghang mga kaso sa coronavirus disease.

Ang bakuna gigama sa Gamaleya National Research Institue of Epidemiology and Microbiology nga nagbase sa Moscow ug gigastuhan sa Russian Direct Investment Fund (RDIF).

Matod sa RDIF nga ang clinical trial sa bakuna gipahigayon sa tunga-tunga sa Hunyo ug gipaabot nga ilusad ang mass production sa bakuna sa tunga-tunga sa Septiyembre 2020.

Ang preclinical studies sa mga unggoy ug hamster nagkompirmar sa ka epektibo ug kaluwas sa bakuna, matod sa RDIF.

Matod ni Khovaev nga ang bakuna gisuwayan ngadto sa volunteers ug bisan sa CEO sa RDIF, iyang asawa ug mga ginikanan ug maayo ra silag kahimtang.

Siya niingon nga dali rang naugmad ang bakuna kay kini modified nga bersyon sa bakuna nga gigamit pagkombate sa laing mga sakit.

Si Khovaev niingon nga ang mga Ruso nga sayantipiko nakagama usab og mga bakuna batok sa Ebola ug MERS Cov.

Samtang, ang World Health Organization (WHO) sa usa ka press briefing niingon nga dunay tulo ka guidelines, regulations ug rules unsay buhaton alang sa luwas nga pag-ugmad sa mga bakuna.

Sa guidelines sa WHO kinahanglan ang mga bakuna moagi sa tulo ka mga hugna sa di pa lisensyahan.

Ang Ruso nga bakuna naa pa sa ikatulong hugna sa iyang mga pagsuway.