COVID SA LAPU-LAPU NAGKAMINOS NA
Gihulagway ni Lapu-Lapu City Mayor Junard “Ahong” Chan nga epektibo ang pakigbatok sa coronavirus disease (Covid-19) sa dakbayan.
Kini human nga nakita sa ilang graph nga mikunhod ang mga kaso sa dakbayan sa milabayng mga adlaw human kanunay nga nagsaka sa milabayng mga buwan.
Makita usab sa graph ang pagsaka sa mga nakarekober matag adlaw.
Makita sa graph ang pagsaka sa kaso sa dakbayan hangtod nga miabot sa tag 100 na ang matala matag adlaw sugod sa Hunyo 28.
Nagpadayon kini hangtod nga nianang Hulyo 17, nakatala ang dakbayan og 25 lang ka kaso.
Human sa maong adlaw, makatala pa ang dakbayan og labing minos 50 ka kaso hangtod nga sa miaging Hulyo 31, nakatala na lang sila og 10 ka kaso.
Human sa Hulyo 31 hangtod karong bag-ohay lang, makatala na lang ang dakbayan og labing menos 25 ka mga kaso ngadto sa ubos sa 10 matag adlaw.
Nunot niini, gipasalamatan sa mayor ang mga Oponganon ug frontliners sa ilang kooperasyon ug sakripisyo sa pagsunod sa lagda nga gipatuman sa kagamhanan sulod na sa lima ka mga buwan.
“Sayod ako nga sayo pa para mosulti niini pero dako ang akong pagsalig nga maayo ang dagan sa sitwasyon sa Covid-19 sa atong syudad,” matod ni Chan.
Samtang sa recovery rate sa dakbayan, makita sa ilang graph nga moabot sa 10 lang ang nakarekober sa Mayo 22, apan misaka kini ngadto sa 20 sa Hunyo 20 ug misaka sa 25 sa Hunyo 27.
Sa miaging Hulyo 15, misaka pa sa 75 ka indibidwal ang nakarekober ug miabot sa 100 pagka Hulyo 25.
Sa labing uwahing talaan sa dakbayan niadtong Agusto 5, moabot na sa 1,868 ang natalang kaso sa Covid-19, apan 1,210 niini ang nakarekober kun 64.77 porsyento.
“Ang kalampusan nga atong nakab-ot karon atong gipahinungod sa tanang frontliners sama sa atong mga doctors, nurses, mga sakop sa BDRRMO, sa atong city health, sa atong kapulisan, Navy, BFP, Army, volunteers, private groups, barangay workers ug uban pa,” matod ni Chan.
WAY NATALA
Sa dakbayan sa Talisay, walay natala nga kaso sa Covid-19 sa Huwebes, Agusto 6, sumala sa post sa Talisay City Public Information Center Facebook Page.
Gikan sa pag sugod sa pandemia nga ang siyudad sa Talisay nasudlan og mga nagpositibo nga pasyente, mao kini ang labing unang adlaw nga way natala nga bag-o.
Sa mao nga adlaw, dunay duha nga natala nga naulian na.
Upat na usab ka mga barangay sa dakbayan ang Covid-19 free nga naglangkob na sa Tanke, Manipis, Candulawan ug Jaclupan.
Sa kinatibuk-an, adunay 763 ka kaso ang Talisay, apan ang aktibo naa nalang sa 85.
Samtang ang nakarekuber sa virus niabot na sa 601 ug pabilin nga 77 ang nangamatay.
Tungod sa mao nga kalambuan, si Secretary Roy Cimatu niingon nga hayan ang Dakbayan sa Talisay, apil ang mga lungsod sa Minglanilla ug Consolacion, ipaubos na sa modified general community quarantine (MGCQ), labing lugak sa tanang quarantine level.
Sa mga lugar sa Probinsya sa Sugbo, ang tulo na lang ka mga lokalidad ang ubos sa general community quarantine kay ang ubang dapit naa na sa MGCQ. /