2 KA BARANGAY OFFICIALS DAKPAN SA TIGBAKAY
Duha ka mga barangay official sa lungsod sa Argao, habagatang Sugbo, apil sa nadakpan dihang gironda sa kapulisan sa lungsod niadtong Huwebes sa alas 2 sa hapon, Agusto 6, ang tigbakayan sa Barangay Canbanua.
Ang nasikop mao si barangay konsehal Edilor Subrecary Salomere, 58, lumolupyo sa maong barangay ug Jimster Salomere Bajenting, 34, iyang barangay treasurer,
Lakip sa nasikop sa mga sakop sa Argao police station mao silang Ruel Escalante, 54, taga Barangay Poblacion; Nikki Romanillos Yting, 50, giingong nagpasiugda, ug Angelo Abella Bajo, 32.
Samtang ang nakadagan nga wa na madakpi mao silang Lemuel Cañete ug Carlo Quintanar, pulos taga Poblacion, Argao ug Richard Sarsaba,
taga barangay Canbanua.
Matod ni Police Captain Elston Dabon III, hepe sa Argao police, nga nakadawat silag tawag sa usa ka concerne citizen sa Barangay Canbanua nga adunay nagpadayon nga tigbakay nga gipadagan ni Yting.
Dali dayon nga girespondehan sa mga police nga miresulta sa pagkasikop sa lima.
“Naaktuhan ra gyud namo sila didto nga nagsugal sa tigbakay human naay nag inform sa amoa nga naay ongoing nga nag sabong ba,” matod ni Dabon sa Superbalita Cebu.
Nakuha sa kapulisan sa Argao ang duha ka mga manok nga maoy gitari, usa niini patay na, lakip ang kwarta nga sugal sa mga dinakpan.
Gibutyag ni Dabon nga karon pa sila makadawat og impormasyon nga adunay nag tigbakay sa lungsod sa Argao.
Tungod niini, iyang pahimangno sa mga lumolupyo sa lungsod nga di mosupak sa executive order ni Cebu Governor Gwendolyn Garcia ning panahon sa pandemic tungod kay hugot pa nga gidili ang mga tapok-tapok bisan kon gipaubos ang tibuok lalawigan sa modified general community quarantine.
Iyang sugyot nga kanunay nga i-obserbar ang minimum health standard sama sa pagsulob kanunay sa face mask ug ang social distancing. /