PANINGKAMOT
Tambag ni Hontiveros sa Cebu cagers nga manimpalad sa Manila
Adunay tambag ang Sugbuanong basketball legend ug kanhi Gilas Pilipinas member Dondon Hontiveros sa batan-ong players nga gusto moduwa sa Manila alang sa UAAP o NCAA.
Usa sa mga players nga motapon na sa Manila mao mismo ang iyang anak nga si Isaiah “Ice” Blanco nga mosulod isip freshman sa college human niya agaka ang University of Cebu (UC) Junior Webmasters sa Cebu Schools Athletic Foundation Inc. (Cesafi) high school division.
Ang Cesafi All-Star nga si Blanco nakadawat og tanyag sa mga dagkong mga tunghaan sa Manila sama sa Ateneo de Manila, La Salle, University of Sto. Tomas (UST) ug Far Eastern University (FEU).
“There are pros and cons sa different schools but again it boils down when he makes the decision. A player must be really committed on that decision. Kami mo-support ra gyud mi kuyog sa iya mama,” matod sa kanhi superstar sa Cebu Gems sa phone
interview sa Superbalita Cebu. “Di man guaranteed what will happen, so you have to really work for it. It boils down sa
effort and discipline sa bata. It’s really challenging diha man ta mo-grow kon naay challenge, di ka ma-improve if wala kay lisod nga challenge agian,” dugang niya. Daghan na pud ang players sa Sugbo ang nakadesisyon nga moduwa sa Manila human nakanselar ang 2020 Cesafi season tungod sa hulga sa coronavirus disease (Covid-19). Sa high school, si reigning Most Valuable Player L.A Casinillo sa Sacred Heart School-Ateneo de Cebu naka commit na sa UST Tiger Cubs kauban si Nichole Jay Cabanero ug si Vincent Raymund “Soysoy” Escobido II sa Don Bosco Technical College.
Ang Cesafi 2019 Partners Cup high school MVP nga si Kevin Guibao naka commit na pud sa FEU men’s team.
Samtang sa college division ang usa sa pambato sa University of the Visayas (UV) Green Lancers mitabok sa University of the Philippines (UP) Fighting Maroons sa UAAP.
Ang super rookie pud sa Green Lancers nga si Gabriel Cometa manimpalad sa San Beda Red Lions sa NCAA.
Si Hontiveros nagkanayon nga angay gamiton sa mga players ang dako nga panahon karon para ma improve ilang kaugalingon pinaagi sa home-based training una molarga sa Manila.
“Kani mao ni best time to prepare themselves. There are information and personal training sa internet. Hinoon wala ta kabalo if kanus-a gyud mag start ang UAAP and NCAA,” matod niya.
Dugang ni Hontiveros nga oportunidad kini sa players nga makaduwa sa Manila kay wala may liga diri sa Sugbo human ma-cancel ang Cesafi Season.
“Opportunity na gyud if molarga sila and of course di sad ta ka blame sa schools nga interested sila sa players. Ang players dali ra man pud na madani basta naa lay duwa,” dugang sa konsehal sa dakbayan sa Sugbo. /