Naa'y PBA teams nga mosunod sa NBA 'bubble'

Ubay-ubay nga teams sa Philippine Basketball Association (PBA) ang naglaraw nga sun-on ang konsepto sa “bubble” sa National Basketball Association (NBA) sa higayon nga hingpit na nga makabalik sa training ang ilang mga magduduwa.

Nagkanayon si Commissioner Willie Marcial nga sa iyang nasayran, ubay-ubay ang mosunod sa bubble gumikan kay mao kini ang hinungdan nga nagmalampuson ang NBA season restart.

Nagpanikad na unta ang teams nga makabalik sa training apan nalangan na sab kini human gibalik sa Modified Enhance Community Quarantine (MECQ) ang National Capital Region sulod sa duha ka mga semana gumikan sa padayong pagsaka sa mga kaso sa coronavirus disease 2019 (Covid-19).

“May mga teams na gagawa nun sa workouts nila,” matod ni Marcial. “Ewan ko lang kung matutuloy kasi naudlot na naman (yung schedule).”

Sa bubble set-up, ang matag team ipahiluna sa usa ka hotel o resort nga maoy ilang puyan hangtod mahuman ang workout sessions.

Ang PBA adunay giimplementar nga “closed circuit concept” nga konsepto diin estriktong bantayan ang lakaw sa mga magduduwa ug coaches matag adlaw gikan sa balay paingon sa gym ug balik balay.

Sa ilang habig, ang NLEX Road Warriors mas ganahan sa bubble nga konsepto ug andam na sila niini. Sa sayo

pa, ang bubble nga konsepto gisupak sa PBA gumikan sa ka dako og gastuhanan ning maong ideya.

Apan gumikan sa kalampusan sa NBA season restart, hayan gikonsiderar pagbalik sa PBA teams ang bubble.

“Let’s learn from some of the best sports franchises and organizations in the world and what they do, what they can do, what works, what doesn’t work, and then let’s see how we can adopt that in our own setting with the PBA,” matod ni Alaska team owner Wilfred Uytengsu nga napatik sa www.pba.ph.