LAKERS NAKATILAW NA SAB OG KASTIGO
Nasugamak sa laing dakong kapildihan ang Los Angeles Lakers kagahapon batok sa Houston Rockets, 113-97, sa 2019-20 National Basketball Association (NBA) season restart sa Walt Disney World Resort sa Orlando, Florida.
Ang duha ka mga kampo ningkombati nga parehong kuwangan og lig-ong haligi.
Wala moduwa sa Lakers si four-time MVP LeBron James, kinsa nipahuway alang sa
pagpaalim sa angol sa iyang bilahan, samtang ang Rockets ningkombati nga wala ang one-time MVP Russell Westbrook, kinsa nagpaalim sab sa angol sa iyang tuo nga paa. Hinuon, ang kombinasyon sa maayong duwa ni James Harden ug long-range shooting igo na aron makmakon sa Rockets ang Lakers. Gipangulohan ni Harden ang Rockets pinaagi sa iyang 39 puntos ug 12 ka assists samtang nidugang og 20 puntos si Ben McLemore. Ang Rockets aduna pa’y laing tulo ka mga magduduwa nga nakamugna og dobleng numero nga puntos.
Ang Lakers, nga nakasakmit nang daan sa No.1 seed sa Western Conference, igo lang mirehistro og 2-of-9 sa threepoint shooting kumpara sa Rockets nga mitali og 21-of-57. Gimugna sa Lakers ang nagunang 10 ka mga puntos sa 4th quarter aron pahakan ang labaw sa Rockets, 94-89. Taodtaod sab nga wala nakapuntos ang Rockets pagsugod
sa 4th quarter apan dihang gibuak ni Harden ang kahilom sa ilang opensa pinaagi sa layup, hayan mingsutoy na kini paingon sa 16 puntos nga kadaugan.
Si Houston coach Mike D’Antoni grabe nakadayeg sa gipakita ni Harden gikan pa sa pagsugod sa season restart diin nakaposte na sila og 3-1 nga rekord nga nagpainat sa ilang kinatibuk-ang rekord ngadto sa 43-25, ikaupat sa Western Conference.
“His commitment on defense
is number one,” matod ni D’Antoni kabahin kang Harden.
“He stays locked in and is trying to win whatever it takes, accepting the double teams and trying to trying to bust it through to other guys. So there’s a lot of good things to marvel about.”
Ang layup ni Harden maoy nagdugkat sa 11-0 run sa Rockets nga nag-inat og balik sa ilang labaw ngadto sa 105-89 sa nahabiling kapin sa lima ka mga minutos.
“We’re playing pretty good,”
matod ni Harden. “There’s a lot of things especially defensively that we can correct but I think our energy... and pace has been good.”
Ang Lakers, nga nahulog sa 51-17 nga rekord, gipangulohan ni Kyle Kuzma pinaagi sa iyang 20 puntos samtang niamot og 17 puntos si Anthony Davis.
Sa lain pang mga duwa, ningdaog ang Portland Trailblazers batok Denver Nuggets, 125-115, Los Angeles Clippers batok Dallas Mavericks, 126-111, Phoenix Suns batok Indiana Pacers, 114-99, Milwaukee Bucks batok Mimi Heat, 130-116, ug Sacramento Kings batok New Orleans Pelicans, 140-125.