Ayaw na paglangay sa cell site

Naa kitay amigo nga sakop sa media nga nag-post sa Facebook kabahin sa pagpangolekta sa usa ka legal officer og LGU dinhi sa Lalawigan sa Sugbo aron makatukod og cell tower ang usa ka telecom company.

Dali-a dayon nakatawag sa atong kaila ra usa nga PIO. Kay natangtang man ang maong Facebook post, nagtuo ko nga naundang kining maong binuhatan. Apan nagkasabot mi sa maong sakop sa media nga amo unyang bisita-an ang maong LGU inig human niining panahon sa Covid-19.

Nakahisgot kita niini kay sa miaging duha ka semana, nakahisgot man gud si Presidente Rodrigo Roa Duterte nga nakadungog sa taho ni

Globe Telecom CEO Ernest Cu nga iyang ipahamtang ang “most drastic measure” batok sa masakpang naglangay sa pagtukod og mga cell site.

Unsa kaha kining “most drastic measure?” Pamultahon? Prisohon? Isulod og sako, ibitay, dayon paasuhan?

Alang kanako, mas maayong sundon dayon sa mga LGU ang joint memorandum circular sa DILG nga hatagan lang og 16 ngadto sa 20 ka adlaw ang pagproseso sa tanang mga government permit aron mapaspas ang pagdaghan sa atong mga cell site.

Nagsigi kitag reklamo ngadto sa mga telco nga hinay ang signal ug hinay ang Internet. Apan mahurot lang ilang pundo sa pag-follow up niining badlungon nga mga opisyal nga mangilkil aron mopirma og mga permit.

Kadaghan ra ba sa nakakwarta diay. Moabot gud og 25 ngadto sa 30 ka mga permit, depende sa dapit, aron lang makasugod sa pagtukod og usa ka cell site.

Aron makatukod og 5,000 ka mga cell site sa tibuok nasud ang usa ka telecom company, nagkinahanglan mopapirma og 150,000 ka permit.

Kadakong kwarta diay ang gastuhon sa usa ka telecom company para lang sa padangog? Kadaghan ra ba sa mga buaya ug dinosaur karong panahona.

Hinuon, angay seryusohon sa mga opisyal ug LGU kining pamahayag ni Presidente Duterte. Dili baya mo pareho ka suod sa presidente kon itandi nilang Nicanor Faeldon ug Isidro Lapena nga igo lang ibalhin.

LILOAN

Hinuon, makadayeg kita kang Mayor Christina Garcia-Frasco nga naninguha gyud nga makadugang og cell site ang iyang lungsod. Kadugay na ra ba gyud nga nagmika ang signal sa maong lungsod.

Matod pa, kinahanglang maglakawlakaw sa tibuok subdivision aron makadakop og cell signal. Apan nalipay kita nga makabalita nga dunay groundbreaking ceremony sa usa ka cell site sa Globe Telecom ugma sa hapon sa maong lungsod.

Manghinaot kita nga sugod kini sa pagkatap sa dugang mga cell site sa maong lungsod ug sa uban pang dapit sa sa Sugbo.

Nakasabot ko nga daghan sa atong katawhan gusto na gyod maka-simba mao nga nihangyo ko sa IATF ug gitugtan na nila nga 10 percent sa seating capacity sa matag simbahan ang makasimba.”

- Cebu City Mayor Edgardo Labella