PUSHER NAMUSIL; BATA NAPAGAN, NAANGOL
Bata naangol kay gikatahapang drug pusher namusil atol sa buy-bust niadtong Biyernes sa alas 5:15 sa hapon, Agusto 7, 2020 sa Sitio Cogon, Barangay Maslog, Dakbayan sa Danao.
Ang 11 anyos nga batang lalake samdan sa tuong abaga human natapsingan sa bala.
Si Police Colonel Roderick Mariano, hepe sa Cebu Provincial Police Office (CPPO) nga nahinabi sa Superbalita Cebu, nagkanayon nga ang iyang mga sakop sa Provincial Intelligence Unit (PIU) ug Provincial Drug Enforcement Unit (PDEU) mipahigayon og buy-bust kang Elfrd John Cañete Tan, 19, high value individual, taga Sitio Common, Barangay Maslog, Dakbayan sa Danao.
Uban kang Tan ang iyang silingang si Frank Vincent Aguilar, hingkod, kinsa wa madakpi.
Matod pa ni Mariano nga atol sa buy-bust , nilugnot si Aguilar, iyang gitukmod si Tan nga nagmaniho sa motorsiklo.
Paspas ang hitabo kay nakabunot gilayon si Aguilar sa wala matinong kalibre sa armas, gipamusil ang mga sakop sa PIU ug PDEU-CPPO, apan way naigo.
Ang usa ka 11 anyos nga batang lalake nga diha atol sa hitabo naigo, apan si Aguilar nakasibat.
Ang bata uban sa amahan ug ni Barangay Kapitan Nestor Cohon, sa Maslog daling gidala sa tambalanan.
Si Mariano nibutyag nga bigtime sa station level si Tan ug Aguilar, notado sa ilang dapit.
Nakuha nila ang 15 gramos nga drugas.
Mipahigayon pa og follow-up operation ang kapulisan aron pagsikop kang Aguilar.
Ang kapulisan ang miabaga sa gasto sa tambalanan. Hinuon, daplis ra ang samad sa bata.
Way puas ang anti-drug operations sa kapulisan.
Upat ang nadakpan sa buybust niadtong Biyernes, alas 11 sa gabii, Agusto 7, 2020, sa mga sakop sa Drug Enforcement Unit (DEU) sa Sawang Calero Police Station nga niresulta sa pagkasikop sa upat ka mga tawo sa may dan Tres de Abril, Barangay Punta Princesa.
Si Police Major Eduard Sanchez, hepe sa Sawang Calero Police Station sa Cebu City Police Office (CCPO), nga maoy nangu sa buy- bust, niila sa mga suspek nga sila si Edward Ramas, 43, taga Barangay Mambaling; Dante Ylaya, 39; Vernanie, 37, live-in ni Ramas; ug Constancio Dagala, 48, taga Barangay Kamputhaw.
Dugang ni Sanchez nga nasakmit gikan sa upat ang shabu nga mobalor og kapin P100,000 subay sa Dangerous Drugs Board (DDB) value. Nadakpan kining upat sa dan Tres de Abril sa Barangay Punta Princessa ning siyudad.
Matod ni Sanchez nga si Ramas ilang na-monitor human sa usa ka impormasyon nga gihatag kanila nga bisan panahon sa enhanced community quarantine
(ECQ), padayon gihapon ang pagpamaligya og illegal drugs.
Si Ramas mag-atubang og kaso sa pagpamaligya ug paghupot sa ilegal nga drugas samtang ang tulo pasakaan og kasong paghupot sa maong kontrabando. /