Lakers dili moabot sa finals: Durant

Kon si Kevin Durant maoy pangutan-on, walay Los Angeles Lakers nga masulod sa finals ning nadelatar nga season sa National Basketball Association (NBA).

Iyang gipanagna nga magabot sa finals ang Los Angeles Clippers nga gipangulohan ni Kawhi Leonard ug ang Milwaukee Bucks nga gibituonan ni Giannis Antetokounmpo sa best-of-seven championship.

Dugang niya nga ang Clippers mobuntog sa Bucks sa maong serya aron langkaton ang ilang unang kampiyonato sa NBA.

Kon matinuod man gani ning iyang pangagpas, hayan makakulit si Leonard og kasaysayan isip pipila lang ka mga players sa NBA nga nahimong back-to-back champion ubos sa duha ka managlahing team.

Pero masipyat og gamay ang panagna ug ang Bucks maoy makampiyon, mao usab unya kini ang unang titulo sa Milwaukee human niadtong tuig 1971 diin nagduwa pa sa maong team si Kareem Abdul-Jabbar.

Kining maong panagna nakapaisa sa kilay sa mga fans sa Lakers, pero dili halayo ang posibilidad nga mahitabo ni.

Sa niagi bitawng tuig, maayo man ang dagan sa Lakers sa sayong bahin sa season, apan sa kalit lang nilubad kini sa dihang nagkadugay ang arangkada sa mga teams.

Hinuon, daghan usab ang nangagpas nga ang Clippers ug Bucks ang nalakip sa mga title favorites ning maong season bisan pa gani niadtong wala pa suspensuha ang mga duwa niini tungod sa coronavirus diseases (Covid-19).

Napanglantawan ni Durant nga ang Lakers mabuntog sa Clippers sa Western Conference finals samtang lupigon usab sa Bucks ang defending champion Toronto Raptors sa East.

Sa senaryo karon sulod sa gitawag og bubble didto sa Florida, ang Lakers (51-17) napildi na og tulo sa lima nila ka duwa apan sa gihapon nagpabilin nga nag-una sa Western Conference.

Aduna na lang silay tulo ka duwa nga nahabilin sa dili pa matapos ang regular season. Bisan pa og mapildi sila niining tulo, magpabilin gihapon sila nga no. 1 sa West kay bisan pa og moharos ang nagsunod nila nga Clippers (46-22) sa upat ka duwa, dili gihapon kini makaapas kanila.

Posibling kini maoy gibasehan ni Durant kay mora man og nagka-us-os ang performance sa Lakers karon sulod sa bubble.

Pero dili usab ikasalikway ang posibilidad wala na mag-apas og daog ang Lakers sa ilang mga duwa sa regular season tungod kay lagi mga no-bearing games na man kini.

Mahimong dili na usab sila interesado nga maoy mo no. 1 sa overall standing tungod kay wala na may homecourt advantage sanglit ang tanang duwa anha na man sa Orlando ipahigayon.

So, ang ilang gihimo karon mao ang paghatag og playing time o pagpahanas sa ilang mga second o third stringers aron ilang masaligan usab sa playoffs.

Ang gipamahayag ni Durant maoy magsilbing hagit nila ni LeBron James ug Anthony Davis.

Samtang sa Eastern Conference, ang Bucks (55-14) bisan tuod og 2-2 sila sa bubble sigurado na usab nga ma no. 1 sa ilang division kay distansiya ra man sab kaayo ang Raptors (49-19).

Naklaro na usab sa East ang masulod sa playoffs. Ang Magic (32-28) maoy nakahulbot sa katapusan ug ikawalong puwesto tungod kay ang no. 9 nga Washington Wizards wala may nadag-an sa lima nila ka duwa sa bubble ug naunlod ngadto sa 24-45 nga record.

Sa Wester Conference, sikit ang kombati tali sa Memphis Grizzlies (33-37) ug sa Portland TrailBlazers (32-38) alang sa ikawalo ug katapusan nga puwesto sa playoffs.

Kini human nga ang Grizzlies nasugamak og upat ka pildi sa lima ka duwa samtang ang impresibo ang gipakita sa TrailBlazers (3-1).

Karong semanahona, mahibaw-an na nato ang mga teams nga madala sa playoffs.