DAKONG MULTA SA Q PROTOCOL

IPATUMAN SA SIYUDAD SA SUGBO SUGOD SA AGUSTO 16

Kon naa ka sa Cebu City, pagbantay, kinahanglang motuman ka kanunay sa mga quarantine protocol kay kon di, bug-at nga multa ang maghuwat kanimo.

Sugod sa Agusto 16, ang imong silot nga atubangon mao na ang bug-at nga multa, di na ang community service ug uban pa.

Sa maong adlaw, moepekto na ang Cebu City Ordinance No. 2566 kun “An Ordinance Penalizing any Violation in Relation to the Implementation of General/Enhanced Community Quarantine in Cebu City During Public Health Crisis” nga giaprobahan niadtong Hunyo 26.

Ang Cebu City ubos sa general community quarantine (GCQ) hangtod sa Agusto 15.

Human ang ordinansa gipublikar niadtong Hulyo 31 usa ka mantalaan nga dunay general circulation, ang ordinansa moepekto paglabay sa 15 ka mga adlaw, busa sa Agusto 16.

Ang ordinansa gipangamahanan nila ni Cebu City Councilors Dave Tumulak, Raymond Alvin Garcia ug Phillip Zafra.

Di lang ang Siyudad sa Sugbo ang naay ordinansa nga nagpamulta sa mga nakalapas sa quarantine protocol.

Ang mga Dakbayan sa Mandaue ug Lapu-Lapu dunay kaugalingong mga ordinansa nga nagpahamtang usab og dagkong mga multa sa mga malapason.

Mas kuyaw sa Siyudad sa Lapu-Lapu kay bisan kinsa ang mahimong makadakop gamit ang citizens arrest.

PILA ANG MULTA?

Sa Cebu City, ang makalapas sa quarantine protocol multahan og P1,500 sa unang kalapasan; P3,000 sa ikaduhang paglapas; ug P5,000 sa ikatulong paglapas kun 30 ka adlaw nga pakabilanggo depende sa gimbut-an sa hukmanan.

Nia pay laing makapabug-at. Ang makalapas nga residente hayan di na makadawat sa mga benepisyo ug allowances nga gihatag sa Siyudad sama sa financial assistance, tax amnesty, ug uban pa, sud sa duha ka mga tuig sukad sa pagpahamtang sa silot. Sa makalapas nga mga establisemento, ang business permit mahimong i-revoke o mahimong ipasira ang establisemento.

Atol sa community quarantine, ubos sa enhanced community quarantine, general community quarantine o mas lugak pa, gikinahanglan ang kanunay nga pagsul-ob og face masks; pag-obserbar sa 1.5 meter social distancing sa pampublikong mga lugar ug commercial ug balay patigayon ug usa ka metro sa public o pribadong sakyanan; mandatory nga stay-at-home order; ug pagsul-ob og quarantine pass kon dunay paliton. Ubos sa Section 10 sa ordinansa, ang gidili nga mga buhat naglakip sa paggawas sa balay nga way quarantine pass; paggawas sa balay bisan dunay stay at home nga mando/o wa pagsul-ob face mask; pagsuroysuroy sa pampublikong lugar nga wa makapamatuod nga dunay paliton o exempted, nag-inusara o grupo; pagbiya sa palibot sa balay atol sa gimando nga home quarantine o self quarantine alang sa gitakdang gidugayon nga gimando sa Siyudad o health department; bisan unsa nga matang sa mass gathering sama sa party; kalihukan sa pista o ubang panagtapok nga non-essential; wa pagtuman sa social distancing; pag-tamper o paggamit sa peke sa quarantine pass; wa pagtuman sa awtoridad; ug bisan unsang mga kalapasan sa probisyon nga gikonsiderar nga salaud ubos sa executive order nga nagdeklarar sa state of community quarantine status.

Ubos sa Section 9 sa ordinansa, balido ang di pag-obserbar og social distancing sa mga kaso sa emergensya diin gikinahanglang buhaton ang dinaliang aksiyon ug sa dinaliang pagbuhat sa tahas sa mga tigpatuman sa balaud ug health care providers, basta nasunod ang kalimpyo.

Mga establisemento, pampubliko o pribadong sakyanan nga gitugotang makadagan atol sa community quarantine kinahanglan mobutang og mga notisya, kinahanglang makita sa publiko ug kinahanglan nga ang tanan nasuwat sa capital nga mga letra nga nag-ingon “FAILURE/ REFUSAL TO PRESENT ECQ PASS, WEAR FACE MASK AND OBSERVE SOCIAL DISTANCING IS PUNISHABLE BY LAW.”

Ang quarantine pass kinahanglang gamiton lang sa pagpamalit sa essential goods, mga tambal, medical supplies ug ubang batakang mga palaliton; paghimo sa mga gimbuhaton sa trabaho sa mga establisemento nga gitugtan sa pag-operate ug uban pang essential nga mga katuyoan.

Ang health care providers, information technology, Business Process Outsourcing (BPO) ug Knowledge Process Outsourcing (KPO) industry workers, ug kadtong naa sa gitugtang mga establisemento mahimo rang mopresentar sa ilang Professional Regulation Commission (PRC) identification card, company ID, certificate of employment (COE) sa paggawas aron pagtrabaho. Ang mandatory stay at home order kinahanglang tumanon sa tanang mga residente, gawas niadtong mga trabahante sa gitugtang mga establisemento ubos sa GCQ sama sa health care providers ug uban pang medical practitioners nga naghatag og medical nga serbisyo; emergency

personnel; tanang awtorisadong national o lokal nga mga opisyal sa kagamhanan ug mga kawani; mga drayber ug personnel sa delivery nga mga sakyanan sa tanang matang sa cargoes;construction workers

nga gitugtan sa kagamhanan; accredited media personnel; mag-uuma, ug uban pa. /