MCPO gihatagan og 2 ka awards
Gihatagan og ganti ang Mandaue City Police Office (MCPO) isip Best City Police Office ug Best Mobile Force Company ug duha pa ka mga kawani ang nakadawat usab og ganti atol sa ika-119 Police Service Anniversary.
Si PCol. Jonathan Abella, pangulo sa MCPO, nakadawat usab og award isip Best Senior Police Commissioned Officer alang sa mga operasyon, ug nakadawat sab og Best Non-Uniformed personnel si Josie Tejano, usa ka kawani sa MCPO.
Sa pakighinabi sa Superbalita Cebu ni Abella, niingon siya nga tungod sa suporta sa ilang mga kawani, lokal nga kagamhanan sa Mandaue ug sa Mandauehanon, kinsa maoy nagtabang nga makabot nila ang maong ganti.
Sa suporta ni Mandaue City Mayor Jonas Cortes sa paghatag kanila dugang mga sakyanan, mas napahingusgan pa nila ang pag-roving sa tibuok siyudad.
Aron sa pagsiguro sa peace and order sa kabarangayan, aduna sab silay gi-deploy nga mga pulis aron moabag sa mga roving sa mga barangay tanod ug pagtubag sa mga alarma nga anaa sa barangay.
Pinaagi niini, dili na mahadlok ang mga tanod nga moresponde og bisan unsang mga alarma sa barangay tungod adunay mga pulis nga mokuyog nila, sigon ni Abella.
Mapasalamaton usab si Abella sa mga Mandauehanon nga kanunay nga nakigtambayayong sa ilang mga operasyon labi na sa paghatag og impormasyon nga kinahanglanon sa pagsulbad sa mga krimen sa dakbayan.
Bisan pa man nga nakadawat na sila og mga award, si Abella miingon nga magpadayon sila nga makanunayon sa ilang pamaagi sa operasyon labi na police visibility sa lungsod.
Sa laing bahin, tungod sa mga giimplementar nga community quarantine mi-minus ang krimen sa dakbayan ngadto sa 60 porsyento gani og adunay mga krimen nga mahitabo, 90 porsyento niini nga mga krimen masulbad dayon sa mga kawani sa MCPO.
Giingon ni Abella nga wala siya’y tukma nga gidaghanon sa mga krimen apan niminus gyud kini kon itandi sa ubang buwan nga wala pa ang community quarantine.
Ang kasagaran nga mga krimen sa panahon sa community quarantine, matod ni Abella, mao ang pagpangawat ug physical injuries.