Bata naigo sa saag nga bala sa pagpamusil sa suspek atol sa buy-bust

Usa ka bata ang naangol human naigo sa saag nga bala gikan sa pagpamusil sa usa ka pusher atol sa buy-bust niadtong Biyernes, Agusto 7, sa alas 5:15 sa hapon sa Sitio Cogon, Brgy. Maslog, dakbayan sa Danao.

Ang 11 anyos nga batang lalake samdan sa iyang tuong abaga human natapsingan sa pagpamusil.

Si Police Col. Roderick Mariano, hepe sa Cebu Police Provincial Office (CPPO) nga nahinabi sa Superbalita Cebu, nagkanayon nga ang iyang mga sakop sa Provincial Intelligence Units (PIU) ug Provincial Drugs Enforcement Units (PDEU) mipahigayon sa buy-bust batok kang Elfrd John Cañete Tan, 19, taga Sitio Common, Brgy. Maslog dakbayan sa Danao ingon man kakunsabo nga silingang si Frank Vincent Aguilar, hingkod ang panuigon, kinsa at large human sa operasyon.

Matod ni Mariano, nga atol sa buy-bust operation nilugnot si Aguilar, iyang gitukmod ang nagmaniho sa motorsiklo nga si Tan.

Paspas ang panghitabo kay nakabunot gilayon si Aguilar sa wala matinong kalibre sa armas ug gipamusil ang tropa sa PIU ug PDEU-CPPO, swerte walay na-igo.

Apan ang usa ka 11 anyos nga batang lalake nga didto sa dapit nahitaboan maoy naigo sa pagpamusil ni Aguilar, kinsa nakasibat atol sa ginukdanay.

Ang bata kuyog sa iyang amahan, daling gidala sa tambalanan sa kapulisan ug Kapitan Nestor Cohon sa Maslog.

Si Mariano nibutyag nga big time sa station level si Tan ug Aguilar, nga mga notado sa ilang dapit.

Nakuha nila ang 15 ka gramos nga drugas.

Mipahigayon pa karon sa follow up operasyon ang ilang tropa batok kang Aguilar.

Ang kapulisan ang niabaga sa gasto sa tambalanan swerte sab kay slight injury ra ang naangkon sa bata.

Subli nga gipahimangnoan ni Mariano ang iyang mga sakop nga kanunay nga dili mokumpiyansya sa ilang mga lakaw labi na sa drugs operasyon kay manukol ang mga kriminal.