Basta Russia pulido
Maayong balita. Dakong grasyang hulog sa langit. Kini bahin sa taho nga ang Russia nakahimo na og bakona batok sa coronavirus disease 2019 (Covid-19) nga gikatahong nasuwayan nang luwas ug epektibo. Hinuon, kasaligan ug pulido basta produkto nga ginama sa mga Russo.
Dili matukib nga kalipay sa nagmasulub-ong katawhan kinsa kanunay nag-atubang og hulga sa Covid-19, viral nga sakit nga unang natala sa siyudad sa Wuhan, China nga makamatay ug walay tambal sa pagkakaron
Si Igor Khovaev, Russian ambassador sa Pilipinas, opisyal nga nipahibalo sa naasoy nga kalamboan niadtong Biyernes, Agusto 7, ug iyang gibutyag nga ang tanyag sa pag-supply sa Russian Covid-19 vaccine gisumiter na sa kagamhanan sa Pilipinas alang sa konsiderasyon nga magamit dinhi sa nasod.
Matod ni Khovaev, 20 na ka mga nasod ang opisyal nga ninglagda sa kooperasyon uban sa Russia alang sa paghatod na sa mga bakona sa pagsanta sa kaso sa Covid-19 sa ilang dapit.
Apan motugot kaha ang Pilipinas sa bakona gikan sa Russia? Dili kaha napagan kini sa kalibotanong pulitika tali sa kasadpan ug silangang bahin sa kalibotan? Ubos ning tanan, ang dakong hinungdan sa 'cold war' mao ang negosyo.
Nasayod kita nga dunay mga dagkong kompaniya sa Estados Unidos, Japan ug ubang nasod sa kasadpan nga nagpalambo sa samang bakona.
Mas maayong mosanong ang Pilipinas sa uanng mitanyag aron mawala na ang kabalaka nunot sa pag-abli na sa tuig tingklase 2020-21 uban sa pagpuyo sa bag-ong normal.
Ug ang Russian Covid-19 vaccine maingon nga nahisama sa ulohan sa kanta nga ‘From Russia With Love' ni Matt Monro sa 1960s. Maayo kahang sagupon na nato?