Covid-19 isayaw na lang

Sa labing ulahing taho sa Department of Health, kapin na sa 126,000 ka mga Pilipino ang gitakboyan sa Covid-19, kapin sa 67,000 ang nangaayo, samtang kapin na sa 2,000 ka mga kinabuhi ang nakalas sa maong balatian.

Nahitabo kini bisan pa sa gipatuman nga mga lockdown sa nagkalain-laing mga lugar. Ug kon maminaw ka sa mga pamahayag sa mga eksperto sa panglawas, ang Covid-19 di dali nga mahanaw. Gipangita pa usab ang tambal ug bakuna niini.

Nunot sa mga lockdown, sa pagdili sa mga tawo sa paggawas sa ilang mga panimalay, ilabi na sa mga menor de edad ug sa senior citizens, nitibugsok ang atong ekonomiya. Way trabaho, way suweldo, way ikapalit sa mga merkado.

Samtang wa pay tambal ug bakuna batok sa Covid-19, ang gobyerno mitambag nga maglikay kita nga matakdan, ug kon matakdan man gani, simbako layo ra kadto, likayan nga makatakod sa lain pinaagi sa self isolation, sa pagsul-ob og face mask, social distancing ug pagpanghugas kanunay sa mga kamot.

Apan unsa man ang mahitabo sa atong ekonomiya, sa atong inadlaw nga panginabuhi, sa mga mawad-an sa trabaho, sa jeepney drivers nga di makabiyahe tungod sa pandemic? Ang numero unong ekonomista sa gobyerno miingon nga ato na lang isayaw ang virus.

Si Karl Kendrick Chua, ang acting secretary sa National Economic and Development Authority (NEDA), niingon,

“We have to learn to dance with the virus, two steps forward, one step backward, if needed.”

Kining sayaw nga “two steps forward, one step backward” sama sa sayaw sa Sinulog. Mao kini ang nahitabo sa Cebu City nga gikan sa general community quarantine (GCQ), gibutang sa enhanced community quarantine (ECQ), gibalik sa GCQ, sa modified ECQ ug karon GCQ na sab.

Matod ni Chua, mas mahinungdanon nga sulbaron una ang krisis sa panglawas sa di pa ang economic recovery aron ang atong nasod di magatras-abante. Lig-unon usab ang health care system sa nasod, matod pa niya.

Pero dunay pundo nga giandam ang gobyerno. Lakip na niini ang P140 bilyones nga Bayanihan 2 ug ang giproponer nga P1.3 trilyones nga Accelerated Recovery and Investments Stimulus for the Economy (ARISE) bill. Ambot lang kon di ba kaha kini lamyon lang sa Covid-19.