Isyu kabahin sa face shield
Ang memorandum circular 2020-033 sa Department of Transportation (DOTr) nga nagmando sa mga driver, conductor ug pasahero sa mga pampublikong sakyanan sa pagsul-ob og face mask ug face shield, usa sa pinakainit nga hilisgutanan karon. Ang isyu sa face shield nakaani og grabeng pagsupak. Matod nila wa ni kalainan sa paglisodlisod sa katawhan. Apektado ang budget sumala pa sa uban.
Duna say niingon nga makabalda sa panan-aw sa driver ang face shield, mao nga delikado sa disgrasya. Di man gani maklaro ang karsada bisan hayag ang adlaw, unsa na kaha kong maatlan nga kusog ang ulan. May niingon hinuon nga tumanon kini kay para man sa kaayohan sa tanan samtang nagsigi pa og panghasi ang coronavirus.
Kon ikaw ang pangutan-on , uyon ka o supak ning maong kamanduan? Para nako may basihanan ang reklamo sa uban batok sa face shield.
Akong sugyot, asay maayo nga ilibre na sa gobyerno. Kapoy na kaayo nang siging kuot sa bulsa tungod niining mga memorandum, executive order ug bisan unsa nalang nga gustong ipatuman sa gobyerno. Di gyud mo ka libre og face mask ug face shield?
Ngano lage kon ting eleksiyon kusog man kaayo mong mang libre? Mao pa man gani mogasto sa pangadye sa magpiyesta ang kapilya. Pakapinan pa og disco. Bisan unsa pa nga kamanduan nga ipatuman nga naglambigit og salapi, palihug ilibre ang katawhan aron nga di maguba ang among budget sa pamugas ug panud-an.
Pero balik ta sa giingon sa ubang driver nga sagabal sa mata ang face shield samtang nagmaneho. Simbako madisgrasya og irason ang face shield nga maoy nakaingon? Driver gihapoy basulon sa mananakop. Segurado nako ana. Giuna pa lang unta og atiman ang kahimtang sa mga driver sa dyip nga wa nay panginabuhi sukad pa niadtong Marso. Bentaha pa unta.
Unsa man gyuy klarong kaugmaon para sa liboan ka driver sa dyip? Palihug sa pagpasabot kay puwerte na ka gutom intawon sa atong mga driver. Ang mga operator nagkalisud na sab. Labad ang ulo kong unsaon ning ilang mga unit, diin ang uban datahanan pa.
Dinhi maila nga kamong mga driver sa dyip dali kaayong mailhan kon naay operasyon ang mga mananakop niadtong normal pa ang panahon. Pero ning panahon sa Covid wala nay gobyernong nahinumdum. Kadako ninyo og natampo pagpalig-on sa ekonomiya kaniadto. Tan-awa nga gipaundang mo og pabiyahe, gawas nga nahagsa, himatyonon ang atong ekonomiya karon.
Samtang nagpabadlong ang uban, diay mga polis nga padayong nisidlak ang ilang mga bituon tungod sa serbisyong way paglubad bisan ning panahon sa pandemya. Pahalipay alang kang Attorney ug Police Major Gerard Ace Pelare ug kaubanan. Ang iyang gidumala nga Talisay City Police Station maoy napili nga Best Component City Police Station atol sa pagtapos sa 25th Community Relations Month sa PRO-7.
Way kalainan sa gitawag nga habit alang kang Maj. Pelare ang paghakot og pasidungog kay mao sab ni ang iyang gihimo sa siya pay pangulo sa kapulisan sa Danao City ug lungsod sa Consolacion. Pahalipay sab kang Police Colonel Jonathan Abella sa iyang pagkapili nga Best Senior Police Commissioned Officer for Operations atol sa ika-119 nga Police Service Anniversary niadtong Agusto 6. Si Abella maoy Director sa Mandaue City Police Office.
Gikan gihapon sa maong police office, congratulations kang Ms. Josie Tejano napili nga Best Non-uniformed Personnel. Ang Mandaue PNP napili sab nga Best City Police Office ug Best City Mobile Force Company.
Nakasabot ko nga daghan sa atong katawhan gusto na gyod makasimba mao nga nihangyo ko sa (Inter-Agency Task Force) IATF ug gitugtan na nila nga 10% sa seating capacity sa matag simbahan ang makasimba.”
- Cebu City Mayor Edgardo Labella