I don’t want to let this go
Daghan pa mig giestoryahan si Wilda. Ang tanan bahin sa lovelife.
“Kon si Roel ang imong sugton, ako na lang si Raul, ha, Marlene?”
Nindot kaayog smile si Wilda. Nakapanglingo ko sa kapilya sa akong best friend. Ingon gyud siya ani, prangka ug usa kini sa akong nagustohan niya. Gusto kog prangka ang binuhat. Di ko anang maayo sa atubangan apan kon nagtalikod ka libakon ka.
“Aw, sure, Wilds. But unsa kaha kon si Raul ang akong sugton, si Roel na lang ang imo.”
Mikatawa kog kusog. Nagkinataw-anay mi si Wilda. Unya nagbuwag na mi kay lain man ang iyang agian padulong sa ilang balay. Ug samtang naglakaw ko, di ko malimot sa giingon ni Wilda nako sa among paggradwet sa hayiskol sa among lungsod. Schoolmate ko siya apan suod ko siyang amiga.
“Gusto nako, Marlene, nga ang una kong boyfriend mao si Raul. You know, secret love nako siya.”
Nakapanghupaw ko nga naghunahuna sa gisulti ni Wilda nako kaniadto. Hangtod karon wa pay boyfriend si Wilda. Guwapa siya apan bisan mga guwapo ug gikan sa maayong breeding ang mga nangulitawo niya, apan wa gyud siyay gisugot. Maybe naghuwat siya nga pangulitawhan na ni Raul.
Kon pangayuon pa lang ang gugma, dugay na tingaling gipangayo ni Wilda kang Raul ang gugma ani.
Pagka gabii, naandan ko na nga magkanta-kanta sa among lawn. Duyogan ko sa sista ang akong pagkanta. Ako ra sab ang moduyog. Sukad pa sa akong pagka bata mahiligon na kong mokanta-kanta. Gipalitan gyud ko ni Papa og gitara aron makat-on ko sa pagduyog sa akong pagkanta-kanta. Ug kay talent gyud tingali nako ang pagkanta, dali ra kong nakamaong moduyog sa sista.
Ning gabhiona, born free ang akong gikanta. Hinay ra ang akong tingog. Gusto lang kong malingaw aning gabhiona kay gilaayan ko sa sulod sa akong kuwarto. Unya samtang nagkanta ko, kalit nga dunay mi-duet nakog kanta. Sus, si Raul diay ang nahiabot nga misulod sa among lagwerta. Abli man ang pultahan sa among gate.
Unya, sa natunga-tunga na ang among pagkanta, nahiabot si Roel ug miapil sa among pagkanta.
(SUMPAYAN)