SUNS MAS INIT KONTRA HEAT

Padayong misidlak ang naglagiting nga kainit sa adlaw sa Phoenix Suns sa ilang pagsunog sa Miami Heat, 119-112, kagahapon sa 2019-20 National Basketball Association (NBA) bubble season restart sa Walt Disney World Resort sa Orlando, Florida.

Ang Suns mirehistro sa ikalima nilang sunodsunod nga kadaugan sa bubble ug mao na lang kini ang bugtong team nga wala pa nakatilaw og pilde gikan sa pagbalik sa aksyon sa liga.

Ang maayo nilang gipakitang duwa sa bubble naghatag kanila og hayaghayag nga poruhan nga maka-ilog sa ikawalo ug katapusang luna sa playoffs alang sa Western Conference.

Sa kasamtangan, ang Suns ningsaka sa ika-10 nga dapit sa West dala ang 31-39 nga rekord diin sikit silang nagukod sa No.9 Portland TrailBlazers (32-39) ug No.8 Memphis Grizzlies (33-37).

Sa ilang bahin, ang Heat nahagsa sa 43-27 nga rekord apan nagpabilin ra gihapon sila sa ikaupat nga dapit sa Eastern Conference, nga nakakompleto na sa ilang walo ka playoffs casts.

Sama sa naandan, ang Suns gipangulohan na sab ni Devin Booker pinaagi sa iyang 35 puntos samtang nidugang og iyang kaugalingong career-high si Jevon Carter nga 20 puntos.

“I think this bubble opportunity was big for us and we’re taking advantage of it,” matod ni Booker.

Ang Heat gipangulohan nila ni Duncan Robinson ug Tyler Herro pinaagi sa ilang 25 puntos matag usa.

Ang Suns ningsulod sa bubble nga ikaduha sa adunay labing ubos nga standing sa 22 ka teams nga nakabalik og duwa gikan sa pagkahunong sa aksyon sa liga niadtong Marso 11, 2020 tungod sa hulga sa coronavirus disease 2019 (Covid-19).

Apan lahi nga imahe ang gipakita sa Suns sulod sa bubble gumikan kay sila na maoy nahimong labing gikahadlukan ning puntoha sa kompetisyon.

“I just think we had a group who wanted to come here and prove they were worthy of being here,” pasabot ni Suns coach Monty Williams. “They heard a lot of stuff that was being said.”

Sa wala pa ang Miami, ang nag-unang upat nga gipakaging sa Suns sulod sa bubble mao ang Washington Wizards, Dallas Mavericks, Los Angeles Clippers ug Indiana Pacers.

Sa laing mga duwa, ningdaog ang Los Angeles Clippers batok Portland, 122-117, Denver Nuggets batok Utah Jazz, 134-132, Indiana Pacers batok Los Angeles Lakers, 116-111, ug Dallas Mavericks batok Milwaukee Bucks, 136-132.

/ AP PHOTO ■ FOUL: Nakahagpat og foul si Phoenix Suns guard Devin Booker (wa) gikan kang Miami Heat forward Kelly Olynyk (9) sa iyang pag-itsa ning aktuha sa aksyon sa NBA season restart kagahapon. Ang Suns mirehistro na’g 5-0 sa restart nga nagsaka sa ilang kinatibuk-ang rekord ngadto sa 31-39 nga nagpabuhi sa ilang poruhan nga makasulod sa playoffs.