DepEd: Uniporme sa mag-klase sa balay wa kinahanglana

Wa kinahanglana nga maguniporme sa bisan unsa nga distance learning nga klase.

Mao kini ang giklaro sa Department of Education (DepEd) ning panahon nga way face-to-face nga klase sa tibuok nasod.

Giluwatan kini sa DepEd human dunay public school officials nga nagdasig sa ilang mga tinun-an sa pag-uniporme panahon sa tingklase bisan kon naa ra sa balay.

Matod sa mga opisyal nga kini aron masinati sa mga tinun-an nga ingon sa naa ra sila sa classroom.

Apan matod sa DepEd, sa ilang official Facebook page, gitumong nga di pa unipormehon ang bata aron wa nay dugang galastuhan ang mga pamilya panahon ning coronavirus pandemic.

Ilang gidasig ang mga tinun-an sa pagsul-ob kon unsay komportable ug unsay tukma alang kanila samtang naa nagtunghang sa balay sa balay.

“While face-to-face classes are prohibited, students are encouraged to wear their most comfortable and appropriate clothes while learning safely in their homes,” matod sa DepEd.

NAGPA-ENROLL

Sa Agusto 11, 2020 sa buntag, mokabat na sa 23,053,197 ka mga tinun-an ang nagpa-enroll sa tuig tigtungha 2020-2021, gikan sa kindergarten ngadto sa grade 12, apil na ang alternative learning system (ALS), sa tibuok nasod.

Matod sa DepEd, ang ilang data nagpakita nga dunay 21,463, 111 ka mga tinun-an ang nagpa-enroll sa publikong mga tunghaan samtang 1,551, 015 sa pribadong mga tunghaan.

Ilang gipaabot nga mosaka pa ang mao nga gidaghanon samtang nangabot ang mga taho.

“DepEd is still anticipating increase in enrollment figures as reports from the field continue to come in. Schools will also accept late enrollees even beyond the enrollment period, as stated in DepEd Order No. 003, s. 2018,” pahibawo sa DepEd.