I don’t want to let this go

Giklaro gyud nako ang pinitik sa akong kasingkasing. Di na nako kalimbongan ang akong pagbati. Kinahanglang modesisyon na ko aron ang usa sa akong suitor nga mapakyas maka-move on samtang sayo pa.

“Sure ka na ba gyud, Marlene, nga siya ang imong love?”

Gitawgan ko si Wilda anang pagka buntag. Angay lang siya makahibawo kon kinsa kanila ni Raul ug Roel ang akong gihigugma.

“Sure gyod kaayo, Wilds. Ikaw ang una kon g gipahibawo ani. I don’t want to let this feeling go.”

Human sa among pag-estorya ni Wilda sa selpon, naligo ko sa banyo nga diha ra sab sa akong kuwarto. Dako ang akong kuwarto ug gipabuhatan kini sa akong parents og banyo aron kon maligo ko di na ko mogawas sa akong kuwarto.

Anang pagka gabii, nagkadungan na sab sa pagpamisita sila si Roel ug Raul nako, nagtapad sila paglingkod sa taas nga sopa sa sala. Sa atbang ko nila naglingkod. Gitan-aw ko silag tagsa-tagsa. Seryuso ko.

“Morag duna ka nay desisyon, da, Marlene?”

Nakatan-aw kog dugay kang Roel nga seryuso sab kaayo. Unya hinay kong mitando.

“Angay nga makahibawo na mo kon kinsa ninyo ang akong

love. Unta tinud-on ninyo ang inyong gikasabotan nga modawat sa kapakyasan.”

Nagkatinan-away sila si Roel ug Raul. Ug unya dugay ko nilang gitan-aw. Naghilom sila, morag naghuwat sa akong isulti.

“Tinuod nga lisod ang pagpili ninyong duha kay nasuta man nako nga pulos gyud mo nahigugma nako. Pulos sab mo buotan. Pero usa ra gyud ninyo ang angay kong higugmaon.”

Gitan-aw ko si Raul. Unya si Roel na sab ang akong gitan-aw. Dugay ko siyang gitutokan. Mi-smile si Roel nako. Gipahiyoman ko sab siya. Unya miseryuso kog balik.

“I’m sorry, Roel. Gimahal tika pero inigsuon lamang nga pagbati. Si Raul ang akong tinuod nga love.”

Nakaduko si Roel. Wa siyay tingog. Nagkatinan-away mi si Raul. Nagpahiyomay mi. Nindot kaayo ang among smile sa usag usa. Naggikan sa amo gyud nga kasingkasing ang kalipay nga among gibati niadtong tungora,

Nananghid si Roel nga mopauli na.