Lugak apan higpit

Makaginhawa na intawon og luag ang mga nanag-edad og 15-anyos ngadto sa 21-anyos ug kadtong senior citizens nga di pa molapas ang edad sa 65-anyos. Kining mga edara gitugotan na sa Inter-Agency Task Force (IATF) nga makagawas na sa balay. Apan ang mga local government unit (LGU) maoy magtakda og mga polisiya alang sa pagpatuman gihapon sa minimum health protocol.

Sila si Mayor Edgardo Labella, Jonas Cortes ug Junard “Ahong” Chan puro uyon sa hukom sa IATF. Si Chan maoy miabiba og maayo kay mohangyo unta siya sa IATF nga tugtan ang mga menor ug senior citizen nga makalingawlingaw sa mga beach resort kay sagad manuroy, pamilya man.

Dugay na sab nga wa makagawas kini nga mga age bracket. Laliman ka, sukad pa niadtong Marso nahimo silang mga piniriso sud sa ilang kaugalingong mga balay.

Karon nga nangminos na ang mga kaso ug nahimutang na ang system batok sa pagkatap sa coronavirus disease, panahon na nga mas luagan ang paglihok sa katawhan. Tangtangon ang mga border control point, apan higpit nga ipatuman ang mga health protocol.

Ang nahitabo man gud, ang mga checkpoint maoy nakabara sa trapiko dinhi sa siyudad sa Sugbo. Malangay ang biyahe, alkanse na sab sa negusyo.

Ngano diay kon ang higpit nga monitoring ug implementasyon sa mga heath protocol naa magsugod sa tagsa ka komunidad. Abagan ang mga barangay tanod sa force multiplier nga Task Force Kasaligan. Naa gihapon moabag ang kapulisan.

Ang mga business establishment bantayan og maayo kon sila nakapatuman ba sa minimum health protocol, sama sa pag-require sa face mask ug face shield sa tanang mga higayon. Inay nga kining mga tawo nga gitahasan sa pagpatuman sa mga balaud sa Covid-19 magmika lang, magbarogbarog sud ug gawas sa ilang tagsa ka buhatan.

Tukma na karon nga panahon sa pagpaluag sa lihok sa katawhan, apan mas higpiton ang pagpatuman sa health protocol.