Mga sinehan buksan na?
Niadtong miaging semana, nakigtagbo ang mga mall ug cinema operators kang Mayor Edgardo Labella ug nanghangyo nga buksan na og balik ang mga sinehan. Ubos sa modified general community qurantine (MGCQ) puwede na maka-operate og balik. Apan dinhi sa dakbayan sa Sugbo, wala pa motugot ang kagamhanan nga maka-operate silag balik gumikan sa kabalaka nga mokuyanap ang Covid 19. Mitukod og task force si Labella nga gipangulohan ni Konsihal Philip Zafra aron motuon sa hangyo.
Sa panahon sa pandemya gimanduan ang tanan nga ang tanang kalihokan paga- pigutan gawas lang sa gi-ilang mga essential o kanang mga importante gyud kaayo sama sa pagpalit og mga pagkaon ug medisina. Mao nga daghang nangutana: Essential ba ang paglingaw-lingaw sama sa pagtan-aw og sine? Dili baya nato ikalimod kon unsa ang kinahanglanon karong panahona nga duna kay kalingawan ilabi na ang mga nangatanggong sa panimalay. Ug kining tanan natubag sa teknolohiya.
Pinaagi sa internet nahupay ang kalaay sa katawhan.
Naa na diha ang tanan sama sa games, books, news, Facebook, Twitter ug movies. Pero karon nanghangyo ang mga tag-iya og mga sinehan nga buksan na silag balik og mipasalig nga di kahadlukan ang Covid 19 sa gustong motan-aw og sine. I think they are missing the point. Dili man ang Covid 19 ra gyud ang rason nganong wa nay manan-aw sa sinehan.
Ang internet man maoy posibleng makapasira sa ilang negosyo. Gumikan lagi sa paglambo sa teknolohiya.
Kon motan-aw kag sine dako pa ang magasto kay misaka naman ang bayrunon karon sa pulta. Labi pa kon dalhon ang imong tibuok pamilya. Unya mag-snacks pa ka. Apan kon kompleto ka sa gadgets sama sa television set, computer og cellular phones anaa ra ka sa balay. Hamugaway pa og safe pa ka.
Sa tinud-anay lang puwerting dugaya na nako nga wala makatan-aw og sine. Morag sobra na sa mga lima ka tuig. Gumikan ba kaha kay edad-edaran nako. Pero niadtong batan-on pa ko, aw, apil og linya. Pero karon nga pandemic, angayan siguro nga tun-an og maayo sa atong mga lider og mga medical experts kon angay bang buksan ang mga sinehan.