Let’s make it clear

Gikuhit ko ni Tessie nga akong ig-agaw human ko ikapasulod sa lungag ang bola. Si Tessie ang akong kaabag sa pagduwa ko og golf. Sukad pa sa bata pa ko paborito ko na kining maong klaseng sports. Nakat-on ko ani kay si Papa magduwaan man og golf kaniadto ug kon wa koy klase mokuyog ko niya.

Apan sukad lang nga giatake sa hayblad si Papa, wa na kini magduwaan og golf.

Gipabudlot ni Tessie ang iyang simod, klaro nga dunay gitudlo. Gitan-aw ko ang direksyon nga gitudlo sa simod sa akong cousin. Si Arnel diay ang iyang gipasabot. Nagtindog si Arnel di layo nako. Nagsmile siya ug nagwara-wara sa iyang kamot nako. Mibawos sab ko sa pagwara-wara niya.

Nanarapo ko sa tualya human kog duwa og golf. Giduol ko si Arnel.

“Mouna lang ko nimo sa awto, Katrine.”

Igo ko lang gitando si Tessie. Gisundan ko siyag tan-aw nga mipaingon sa giparkingan sa akong awto.

Mikupot si Arnel sa akong kamot. “Sa gawas ta mag-dinner unya, Kat.” “Next time na lang, Arnel. Gikapoy ko.”

Hinay lang ang among paglakaw ni Arnel padulong sa nahimutangan sa akong awto. Four months ko pa lang nga gisugot sdi Arnel.

“Gikapoy o duna kay laing date?”

Wa ko kayo tagda ang giingon ni Arnel. Nasabtan ko siya. Ingon gyud siya ani, seluso. Apan natural lang tingali kini sa lalaki nga dakog gugma ngadto sa usa ka girl.

“Well, nakatando na ko kang Gabby. Una siyang nangimbetar, dinner gihapon unya.”

“Daan pa ko. Sus, wa gyud diay mohunong kana si Gabby sa pagpangulitawo nimo nga uyab na man ta?”

Bisag klaro nga naglagot si Arnel apan hinay ang iyang tingog. Ingon gyud siya ani, bisag nasuko apan magpabiling hinay ang tingog. Sukad pa kaniadto nga bata pa mi, ingon na ani ang iyang kinaiya. Silingan ra mi si Arnel sa gipuy-an namong subdivision sa Banawa. Pulos dato ang among isig ka mga ginikanan.

Parehas sab mi nga bugtong anak. Mihunong ko paglakaw. Miseryuso ko. Seryuso na sab si Arnel. Gitan-aw ko siya pagayo.