2 KA ANAK GI-COVID; MAESTRA NA-DEPRESSED, NAGHIKOG
Dulag, Leyte - Wa nay kinabuhi nga naabtan sa iyang bana ang usa ka maestra human naghikog gamit ang pisi sulod sa ilang panimalay sa Barangay San Vicente ning lungsod.
Ang lawas nadiskubrehan sa iyang bana ilawom sa hagdanan sa ilang balay, alas 6 sa buntag, Biyernes, Oktubre
16, 2020.
Ang biktima gitago lang sa ngan nga Veronica, 47, usa ka elementary school teacher.
Base sa report sa kapulisan sa Dulag, nakadawat sila og impormasyon gikan sa Dulag Rescue Unit (DRU) bahin sa hitabo.
Ang kapulisan pinangulohan ni Police Master Sergeant Joselito Buhay dali nga miresponde sa lugar aron susihon kon unsa ka tinuod ang insidente.
Naabtan sa kapulisan ang lawas ni Veronica nga nagbitay ilawom sa hagdan sa balay. Ang bana niini usa ka high school teacher.
Matod sa bana sa dihang nakaistorya sa mga imbestigador, duha nila ka anak ang nag positibo sa Covid-19 base sa RT-PCR result.
Sa pagkahibawo ni Veronica,
nakasinati kini og depresyon ug duha ka gabie nga way saktong tulog ug wa nila damha nga maghikog kini.
Ang biktima gideklarar nga patay na ni Dr. Allan Alvarez, municipal health officer sa Dulag.
Way nakita nga foul play ang kapulisan sa kamatayon ni Veronica, apan padayon ang gihimo nga imbestigasyon sa insidente. /