Sabong padayong idili ni Labella?
Daw og sa naghuyaka ang mga sabungero sa dihang gihatagan na og pagtugot sa Inter-Agency Task Force (IATF) nga makabalik na sa operation ang sabong sa niaging adlaw.
Daghan nang mga breeders association, dili lang dinhi sa Sugbo kon dili lukop nasod, ang wa maglangan sa pagpangandam alang sa ilang mga activities sa higayon nga hingpit nga ilusad na unya sa IATF ang mga lagda sa health protocols nga angay sundon.
Atong gikahinabi ug gikuhaan og reaksiyon ang pipila ka mga breeders ug opisyal sa mga breeders association dinhi sa Sugbo kalabot ning kalambuan. Ilang gikalipay ug gihangop ang maong desisyon sa IATF.
Ilang giangkon nga grabi gyud ang ilang alkansi nga nasinati sulod sa pito ka buwan kapin nga pagkasuspenso sa operation sa sabong. Nag overweight na ang ilang mga gi-breed.
Dili lang kay ang mga sabungero ang nangalipay kon dili lakip na usab kadtong mga ginagmay nga nanginabuhi sulod sa buwangan.
Mga gaffer, doktor, masyador, kuymi, mga nagnegusyo og pagpakaon ug ang mga empleyado ug nagdumala sa buwangan.
Ang mga manufacturer og feeds nga aduna usay mga empleyado, ang ilang mga sellers nagmaya usab.
Mora sila og naibtan sila sa tunok kay makapangwarta na man sab sila og balik nga sarang ilang ikagasto sa ilang pamilya.
Pero dinhi sa dakbayan sa Sugbo, ambot og duna bay mga sabungero nga nalipay niining pahibawo ni Mayor Edgar Labella nga dili siya mosugot nga ibalik ang sabong.
Kini bisan pa man og aduna nay aprobal gikan sa Malacañang.
Daghang napugwat sa dihang nialkontra ang pamahayag sa mayor sa giluwatan
nga pamahayag sa IATF nga maoy gihatagan og gahom sa Malakanyang.
Sa atong pagpakighinabi ni Atty. Louie Arma, ang kanhi presidente sa Visayas Gamefowl Breeders Association (Vigba), kansang grupo anaa magbasehan sa Tejero Grand Arena, ning dakbayan, ilang gipadayag ang ilang dakong kasagmuyo sa desisyon ni Labella.
“We understand the concerned of the good mayor. Pero ma i ra man na sa intentions sa IATF pinaagi sa pag-impose og protocol nga istrikto. The least that mayor Labella can do is that ipasiguro nga ang sabongan is protocol compliant.,” matod ni Arma. “Walay spectators or limited ra.” Gitumbok usab ni Arma nga daghang mga tawo nga nanginabuhi tungod sa sabong ug gawas niini, duna usay mga dagkong kompaniya ang naapektohan.
“Duna nay chain reaction.
Kon walay breeding maigo ang mga manufacturers sa feeds kay kinsa pa may mopalit sa ilang feeds and they have their own employees.”
“We are so proud that sabong is a multi-billion industry, so there is also an obligation on the part of the LGU to maintain that multi-billion industry. Di na kinahanglan nga ma expose sa virus kay free man ang LGU nga mag impose sa mga protocols nga makapalayo nato (sa infections),” dugang ni Arma.
Hinaot nga hatagan unta og igong pagtagad ni Mayor Labella kining mga punto nga gisaysay ni Atty. Arma. Atong gisabot nga ang mayor walay hilig sa sabong ug siguro ang mipatugbabaw sa iyang hunahuna nga kini usa lang ka sugal.
Wala siguro niya makita ang aspeto sa ekonomiya ug ingon man ang natabang niini ngadto sa mga ginagmayng patigayon ug panginabuhi sa mga kabos ug ordinaryo natong kaigsuonan.