Kanhi tighugas, sikop sa pagkupot gidiling drugas
Usa ka kanhi tighugas sa usa ka inila nga eat-all-youcan restaurant sa dakbayan sa Sugbo nadakpan sa mga ahente sa Philippine Drug Enforcement Agency (PDEA) 7 niadtong Sabado sa hapon, Oktubre 17.
Si Investigation Agent 1 Jonar Cuayzon sa PDEA -7, maoy nangu sa gihimong anti-illegal drugs operation kuyog ang mga operatiba sa Regional Drug Enforcement Unit (RDEU) 7 nga miresulta sa pagkasikop sa ilang target.
Giila ni Cuayzon ang dinakpan nga si Lin Ford Padigos, 27, ug molupyo sa Sityo Katangkungan sa Barangay Basak Pardo, siyudad sa Sugbo.
Gidakop si Padigos sa mga ahente sa PDEA 7 uban ang mga operatiba sa RDEU-7 sa buy-bust operation ug nasakmitan og 50 gramos sa gituohang shabu nga dunay kantidad nga moabot sa P340mil subay sa Dangerous Drugs Board value.
Matod ni Cuayzon, ang ilang nadakpan makonsidera gihapon nga high value target sanglit ang iyang mga transaksiyon dili moubos sa 50 gramos kon siya ang orderan.
Moabot usab sa usa ka semana kapin ang pag-monitor sa dinakpan hangtud na nga gipatuman ang maong anti-illegal drug operation sa dinakpan.
Si Padigos sa iyang habig miangkon nga siya maoy sugoon sa paghatud sa mga shabu pinaagi sa pag-chat sa Messenger nga maoy ilang komunikasyon sa usa ka ginganlan og Erick.
Bugti sa P5 mil nga maoy iyang suhol kon mahato na ang drugas ngadto sa tawo nga maoy hatdan sa gidiling drugas.
Si Padigos usa ka dishwasher sa usa ka kan-anan nga eat all you can sa dan P. Del Rosario sa dakbayan sa Sugbo usa ka tuig na ang nakalabay.