Kong. Radaza mihatag og tabang sa taga isla
Nakadawat og ayuda gikan ni Kongresista Paz Radaza sa lone district sa dakbayan sa Lapu-Lapu ang duha ka persons with disabilities (PWDs) nga adunay gihambing balatian hinungdan nga wala gayud sila makalakaw sa ilang kinabuhi.
Gitunolan sa kongresista og tag usa ka wheelchair sila si Jendy Baguio, 16-anyos nga taga Sitio Kalipay, Brgy. Sabang, isla sa Olango ug Anthony Cañete 11-anyos nga taga Sitio Suba sa susamang barangay.
Si Baguio adunay Cerebral Palsy sukad sa pagkatawo hinungdan nga dili gayud siya kalakaw.
Nasayran nga usa ka improvised nga lingkoranan lang ang gigamit ni Baguio aron makalihoklihok sa miaging 16 ka tuig.
Samtang si Cañete nakabaton sa susamang sakit human nga nakasinati og convulsion samtang usa pa ka tuig hinungdan nga dili usab siya makalakaw.
Dili usab siya makaestorya ug makalihok.
Ang mga ginikanan sa duha misuwat ngadto sa kongresista kon mahimo bang matabangan ang ilang kahimtang.
Gibutyag sa kongresista nga kanunay na gayud siya nagtan-aw sa mga nanginahanglang Oponganon bisan niadtong siya pa ang mayor sa dakbayan.
“Pirmenti ra man gyud ni atong tabang para sa mga Oponganon. Dia ra man gyud ko sa inyong kiliran ug wa rako mausab, mao lang gihapon ko,” matod ni Radaza.
Ang ginikanan ni Baguio ug Cañete mapasalamaton sa nadawat nga ayuda sanglit wala sila magdahom nga matagaan og pagtagad ang ilang suwat hangyo.
Ang inahan ni Baguio nga si Lowella, usa ka manindahay og isda ug dili gayud paigo ang iyang kita pagpalit og wheelchair.
Mas nakapasamot pa gayud sa iyang kalisod ang nasinating pandemya diin dili na usab makapanagat basta-basta ang iyang bana niadtong estrikto pa ang community quarantine.
Samtang ang inahan usab ni Cañete nga si Arcelly, usa ka labandera ug dili gayud paigo ang iyang adlaw-adlawng kita aron makapalit sa panginahanglanon sa iyang anak.
Gawas sa duha ka PWD, gitagaan usab og pinansyal nga ayuda sa kongresista ang usa ka locally stranded individual
(LSI) nga si Marvin Martinito, kinsa natanggong sa Caloocan nga nakauli sa dakbayan pinaagi sa pakig-alayon sa buhatan sa kongresista.
Katapusang nakadawat og ayuda sa kongresista mao ang usa ka pamilya nga nalunod ang ilang gisakyang motorbanca sa kadagatan sa Bohol ug isla sa Pangan-an pipila ka semana na ang nakalabay.
Ang natagaan mao sila si Lucy Aparese, 72, g Rogelio “Morat” Aparese, 71, lakip na ang ilang mga apo nga nagpangedaron og 6 ug 13 nga taga Brgy Sabang.
Ang banayng Aparese 10 ka oras nga naglutaw-lutaw sa kadagatan sa Bohol sa wala pa mapadpad sa Pangan-an human nga nalunod ang ilang gisakyang motorbanca samtang nangompra alang sa ilang sari-sari store.
Ang pagpaninda mao ra usab ang ilang gisaligan niining panahon sa pandemya.
Sa tanang Oponganon nga nanginahanglan, gipadayag sa kongresista nga aduna siyay mga programa sama sa educational assistance, medical
assistance ug burial assistance nga gipaagi sa mga ahensya sa gobyerno sama sa Department of Social Welfare and Development (DSWD), Department of Labor and Employment (Dole) ug Department of Health (DOH) nga mahimo nilang kadangpan.