Gihugasan sa Covid-19?
Grabe ang pagbunok sa uwan niadtong Oktubre 13, Martes sa gabii sud lang sa pipila ka oras. Subra sa normal ang gidaghanon sa uwan sama sa giyabo sa makausa ang daghang tubig sa Metro Cebu. Ug tungod seguro sa kadaghan nang problema nga giatubang sa katawhan, ang ubang moingon na lang intawon nga gihugasan sa Kahitas-an ang hugaw sa dakbayan lakip sa virus?
Nahitabo ang makalilisang nga baha ug halapad nga lunop sa halos sa tanang dapit sa dakbayan. Dunay kinabuhi nga nakalas. Dakong perdisyon sa kabtangan.
Gisundan pa sa nangaging adlaw ang pagbunok sa uwan, salamat, walay nahitabong trahedya.
Ang Philippine Atmospheric, Geophysical and Astronomical Services Administration (Pagasa) Visayas nipahibalo sa pagtumaw karon sa La Niña phenomenon ug ang Mines and Geosciences Bureau (MGB) sa Region 7 nimando sa pagbantay sa landslides.
Si MGB 7 director Armando Malicse niingon nga ang mga gobernador ug mayor sa Central Visayas gihatagan na og geohazard maps sa upat ka mga lalawigan – Cebu, Bohol, Negros Oriental ug Siquijor – diin makita ang risgo nga mga dapit.
Si Mayor Edgardo Labella nimando na sa pagbakwit sa mga lumolupyo sa delikadong dapit labi na daplin sa suba o sapa sa dakbayan sa Sugbo.
Dili tiaw ang hulga sa populasyon. Ang hulga nagdayon tungod sa daghang komplikasyon sama sa walay maayong drainage system ug pamatasan sa ubang molupyo sa pagpataka og labay sa ilang basura diha sa kasapaan, kanal ug suba.
Taliwala ning wala pa matapos ang pandemiya sa Covid-19 ug ania na sab ang La Niña. Samtang, makapahupay usab sa pagbati ug panghunahuna nga positibo nga namasin nga usa kini ka paghugas sa Metro Cebu labi na sa virus.
Hinaut pa unta, mag-ampo usab kita.