Paglikay sa kahasol
Nagkasabot mi uban sa akong mga igsuon nga mosayosayo pagpanagkot sa sementeryo agi og pagtuman sa mga protocol nga gipatuman sa gobyerno atol sa kasaulogan sa kalag kalag. Nahitabo ni sa miaging Sabado. Una namong giduaw ang lubnganan sa akong amahan nga nahimutang sa Barangay Bato sakop sa siyudad sa Toledo. Salamat sa akong manghod nga si Mercy nakapalit siya og gamayng luna sa maong sam-ang nga maoy gibalhinan sa lubong ni Papa Dading gikan sa Catholic cemetery sa lungsod sa Pinamungajan. Hamugaway ang sam-ang sa Bato sanglit pribado ug layo gikan sa highway.
Sa among pag-abot didto, diha nay pipila ka tawo nga nag-asikaso sa lubong sa ilang mga minahal sa kinabuhi. Gipinturahan ug gipanindot ang mga lapida. Diha na say nanagkot nga sama namo gikan pa sa layo nga dapit. Managsama
ang among tumong.
Sumala sa akong gikaestorya nisayo sila sa pagpanagkot paglikay sa kahasol taliwala sa padayon nga pagpanghasi sa coronavirus. Gikan sa Bato, nilahos mi sa sam-ang sa Pinamungajan aron bisitahan ang lubong sa mga kaliwat sa akong inahan nga lumad sa maong lungsod. Sa among pagsuotsuot sa naglaray nga mga nitso, nabasahan nako sa mga lapida ang pangalan sa mga tawo nga nakapahinumdum nako sa panahon nga nagtungha pa ko sa maong dapit. May mga bansagon nga inila kaayo sa akong panahon hangtod karon. May mga haligi sa lokal nga pangagamhanan ug may pipila nga nag-alagad sa simbahan ug kapilya.
Dugay na kaayo kadto apan mas dali ra nakong nahinumduman ang mga panahon nga nadungog nako ang ilang mga pakigpulong panahon sa kampanya sa eleksiyon. May classmates ug magtutudlo sab ko nga tua gilubong didto. Kutob nalang ko sa paghandum sa panahon nga ako silang gikauban sa Pinamungajan Central School diin nakaeskwela ko gikan sa Grade 3 hangtod sa Grade 5.
Sama sa unang sementeryo, may mga tawo nga nanglimpiyo sa mga nitso agi og pagpangandam sa umaabot nga kalagkalag. Sa among paggawas gikan sa sementeryo, nisugat sa akong panan-aw ang usa ka matahom nga dalagita nga foreigner ang panagway. Ang taliwtiw niya nga ilong, puti nga pamanit ug brown nga buhok makapaduda nga dili siya lumad nga taga Pinamungajan.
Apan nganong naninda man siya og kandila dinhi sa gawas sa sam-ang? Nisulay ko og pakisusi tungod sa pagduda nga nakaila ko sa inahan sa maong dalagita. Ug wa ko masayop. Siya kadtong cute kaayo nga bata nga gikugos sa naninda og kandila dinhi.
Napulo na ka tuig ang nakalabay nga akong gikahibalag ang inahan ug anak atol nga nanagkot ko sa lubong sa akong Papa. Siya si Maria Ray Mercy Hart, anak nila ni John Raymund Hart nga taga London ug Mercy Niñal Hart.
Naminyo sila si Mercy ug John niadtong Marso 2007. Samtang nagsabak si Mercy kang Maria Ray, nipauli si John Raymund sa London apan wala na ka balik kay sa pagka Nobiyembre sa maong tuig, kini namatay.
Natawo si Maria Ray upat ka adlaw human namatay ang iyang Papa John Raymund. Luoy kaayo ang sugilanon ni Maria Ray apan salamat sa mainantoson ug kugihan niyang inahan. Napadako ug napaeskwela niya ang bata taliwala sa tumang ka kabus. Grade 7 na si Maria Ray.
Mahiligon sa pag-awit ug sayaw. Pangandoy niya nga pohon makaduaw siya sa lubnganan sa iyang amahan kuyog ang iyang Mama Mercy.
Maybe in a positive note (of the Inter-Agency Task Force (IATF)), by allowing those under 21 but not below 15 to go out is to develop in them the shared responsibility of keeping themselves healthy and by following the health standards they protect themselves and their families from getting sick.”
- Dr. Mary Jean Loreche, Department of Health (DOH) 7 spokesperson