Let’s make it clear

Nakapanglingo na lang ko nga mitanaw og dugay kang Arnel. Nagpugong na lang ko sa akong kalagot. Gisabot ko na lang siya.

“Nalimot ka na diay sa akong giingon nimo? Di ba sa dayon ko nang sugot nimo nag-ingon man ko nga free love ang tanan, nga dunay freedom ang tanang lake nga mangulitawo nako kon gusto nila bisan uyab na ta?”

Nanghupaw si Arnel. Siya na sab ang nagpanglingo. Mipadayon

mig lakaw, hinay lang gihapon.

“Ug misaad ka nga di ka mosupak sa akong gusto, nga sabton ko nimo. Now, nganong naingon ka man ani?”

“Di lang gyud nako kalikayan nga magselos. Unta kana si Gabby mohunong nag pangulitawo nimo kay nakahibawo man siya nga uyab na ta.”

“Haaayyy nimo, Arnel. Gahi gyod ka pasabton. May kagawasan lagi siyag pangulitawo nako kay mao kini ang akong gusto?”

Wa na magtingog si Arnel. Wa nako tagaig dakong pagtagad ang pagka seluso ni Arnel. Nagtuo ko nga sa madalig madugay modawat siya sa reyalidad nga di pa mi kasal ug ang tanang lalake dunay kagawasan sa pagpangulitawo nako kon love ko nila.

Sa among dinner date ni Gabby anang gabhiona, namatikdan nako nga malipayon kaayo siya. Iyang gikuptan ang usa nako ka kamot nga nagpatong sa ibabaw sa lamesa. Iyang gipisil ang akong palad. Gikuha kog hinay ang akong kamot nga iyang gikuptan.

“You know, kontento na ko nga ikauban tika. Enjoy na ko bisag imposible nga sugton ko nimo.”

Miinom ko sa juice sa akong baso. Gipahiran ko sa tissue ang akong lips. Nangigham ko. Mi-smile ko.

“Nganong nakaingon ka man nga imposible nga sugton tika, Gab?”

“Well, nature man ninyong mga girl nga usa ra gyuy uyab. Aw, nuon, naa may uban nga daghan og trato, kanang gitawag nga playgirl. Pero di ka man playgirl.”

Mikatawa na gyud ko. “Playgirl na gyud diay ang babaye nga ingon ana?”

Mitando si Gabby. Mikatawa na kog kusog. Nahimuot gyud ko sa gipamulong ni Gabby. Wa ko moakseptar sa iyang gisulti. Para nako, nasayop siya sa iyang pagtuo.

(SUMPAYAN)