TNT 4-0 ANG TINGUHA
Magsangka ang pulos walay pilde nga TNT Tropang Giga ug Phoenix Super LPG Fuel Masters sa PBA Season 45 Philippine Cup didto sa Angeles University Foundation Sports Arena and Cultural Center karong adlawa.
Ang TNT nagdilaab sa sayong bahin niining “bubble” season kay puros nila gipanglampurnas ang ilang mga kontra aron sugdan ang season nga adunay 3-0 (win-loss) nga baraha.
Sa ilang tulo ka duwa, nagkayo ang mga kamot sa Sugbuanong si Roger Pogoy, Bobby Ray Parks Jr. ug Poy Erram nga pulos mikulit og careerhigh sa managlahi nga duwa. Si Pogoy maoy unang nipakita sa iyang katakos pinaagi sa iyang 45 puntos batok Alaska, gisundan kini ni Parks sa iyang 40 puntos sa ikaduhang duwa kontra Terrafirma Dyip.
Wa pud magpauwahi sa Erram kay nikulit kini’g iyang kaugalingong career-high nga 27 puntos ug 15 ka rebounds sa ilang duwa batok sa San Miguel Beermen niadtong Biernes, diin ilang gilubong og taga-liog ang defending champions pinaagi sa 107-88 nga iskor.
Susama sa TNT, ang Fuel Masters gadilaab pud sa ilang unang duha ka duwa sa ilang paglupig sa Meralco Bolts ug Northport Batang Pier ubos sa bag-o nga coach nga si Topex Robinson.
Ang kanhi PBA player nga si Robinson mibatbat nga usa sa yawi sa Fuel Masters mao ang ilang team effort.
Pasabot sa ex-Redbull point guard nga ang tanan niyang
players gikan sa sinaligan ngadto sa pinakaubos adunay papel sa team.
Dili gihapon makaduwa ang Phoenix star nga si Calvin Abueva kay gahuwat pa kini sa desisyon sa liga alang sa iyang indefinite suspension nga nagsugod niadtong 2019.
Hinuon, mikuyog na si Abueva sa Fuel Masters didto sa PBA “bubble” nga gipahigayon sa iyang hometown sa Pampanga.
Sa unang duha ka duwa sa Fuel Masters misandig sila kang Matthew Wright, RJ Jazul ug Justin Chua.
Alang sa TNT, posibleng dili makaduwa si Pogoy tungod sa
ankle sprain nga iyang nakuha sa duwa batok San Miguel.
Apan bisan paman wala si Pogoy, nagpabiling lawom ang lineup sa TNT nga naglakip nila Jayson Castro, Erram, Parks, Troy Rosario ug mga beteranong si Ryan Reyes ug Harvey Carey.
Magsugod ang duwa sa TNT ug Phoenix alas kwatro sa hapon, sundan dayon kini sa San Miguel ug Terrafirma sa 6:30 sa gabii.
Ang San Miguel ug Terrafirma pulos nangapilde sa ilang unang duha ka duwa sa “bubble.”
Ang Beermen nanghinaot nga makuha ang historic nga ika-unom nga Philippine Cup title, apan gisugat sila og bati nga sugod sa season diin gipilde sila sa TNT ug Rain or Shine Elasto Painters.
Naghupot og 1-2 nga baraha ang Beermen kay nadala man nila ang ilang daog batok sa Magnolia Hotshots Pambansang Manok niadtong Marso 8 sa wala pa mahunong ang liga tungod sa pandemiya.
Nisamot ang problema sa Beermen kay wala na gani makaduwa ang ilang pambato nga si June Mar Fajardo, na-injured pud ang sinaligan nga guard nga si Terrence Romeo.
Si Romeo dili na makaduwa sa Beermen karon nga season kay kinahanglan kini magpaalim sa iyang shoulder injury sulod sa unom ngadto sa walo ka semana. Na-injured si Romeo dihang nagkabangga sila ni Ryan Reyes sa TNT niadtong Biyernes. Ang Dyip sa laing bahin wa pa katilaw og daog nga adunay 0-2 nga record.
Matod ni Terrafirma coach Johnedel Cardel nga kinahanglan pa nila makuha sa team ang ilang timing ug ila kining paningkamutan nga makuha sa sunod duwa.