Malipayong anibersaryo, Super B!

Karong adlawa tangkod nang 26 ka tuig ang imong kinaham nga Superbalita Cebu. Gikan sa pipila lang ka gatos ka kopya matag adlaw ngadto na sa liboan. Nakab-ot kini ning mantalaan tungod sa way puas mong suporta sa nakalabay nga 26 ka tuig. Nahimo kining mantalaan nga numero uno sud na sa kapin sa duha ka mga dekada tungod sa liboan ka mga magbabasa nga di masipyat sa pagpalit ning mantalaan kada adlaw.

Samtang nagdagan ang panahon, mao usab ang kausaban. Ang Superbalita Cebu miuban sa kausaban. Sulod na dul-an usa ka dekada, kining imong kinaham nga mantalaan naa na sa social media. Ang mobuto nga balita kaniadto imo rang madunggan sa mga sibyaanan sa radyo ug telebisyon. Apan karon, naa na kini mismo sa imong palad. Pinaagi sa usa lang ka pislit sa imong cellphone ug tablet, ang mga hitabo imo nang makita ug madunggan pinaagi sa among Facebook Live.

Di lang kay sa FB, naa usay Twitter account ang Super B alang sa mga update sa mga balita ug uban pa.

Alang sa mas detalyadong estorya sa matag balita, imo kining mabasa sa among website. Apan di tanan hinuon imong makita kay naa pay daghan nga naa lang sa printed nga kopya. Sama sa Sudoku, number tips ug uban pa nga makalingaw.

Bisan pa tuod kon miuban ang Super B sa mga kausaban sa panahon, nagpabilin kini sa iyang misyon: pagpalipang ug pagpreserbar sa Sugboanong pulong isip kampyon sa Bisaya.

Ning panahon sa coronavirus pandemic, daghang mga mantalaan sa tibuok kalibutan nanirado kay nahagba. Bisan ang Superbalita, sa pagsugod sa quarantine, naapektuhan tungod sa pagtibugsok sa sirkulasyon kay wa nay makahatod ning mantalaan sa tugkaran ug nakabaligya sa kadalanan. Apan hinayhinay kining nakabangon, nagkabaskog tungod sa imong way puas nga suporta.

Gikan sa Superbalita Cebu news team, malipayong anibersaryo kanatong tanan!