Hagit sa SuperB
Gisaulog ang ika-26 nga anibersaryo sa Superbalita Cebu kagahapon, Oktubre 23. Hamtong na ang naguna ug unang inadlaw-adlaw nga mantalaang Bisaya sa Sugbo tungod sa iyang dul-an na sa tulo ka dekadang kasinatian sa pamahayag sa Sugbo ug Tungatungang Kabisay-an nga tagos sa iyang pisikal nga sirkulasyon.
Kusog usab ang iyang plata-porma nga walay utlanang maabot pinaagi sa online nga bersiyon sa pagmantala. Mapasalamaton kita sa dakong kalamboan sa mantalaan ug kalamposan sa iyang pag-alagad sa publiko.
Sa pikas bahin, nag-atubang usab kini og dakong hagit ning iyang unang adlaw sa iyang pagtikang sa ika-27 ka tuig ug ngadto na sa umaabot nga adlaw sa pakigharong gikan sa external ug internal nga aspeto.
Sa external, una ang grabe kapaspas ug dakong kausaban sa industriya sa pamahayag tungod sa online media. Ikaduha, ang komplikasyon sa pandemiya sa Covid-19 nga nalatid sa bag-ong normal nga nakaapekto sa daghang negosyo, lakip sa kinabuhi sa prensa.
Sa internal, ang kabalaka kon unsaon sa pagpasikutsikot sa kawsa sa mantalaan alang sa pinulongang Sugbuanon ug Bisayang kultura sa kinatibuk-an. Sumala niadto sa amahan sa mantalaan, Atty. Jesus B. Garcia Jr., ang Superbalita nahimugso dili lang lunlon negosyo apan dunay kawsa sa pagpanalipod ug pagpalambo sa pinulongang Sugbuanon.
Ang mga tagdumala sa mantalaan o media outfit naningkamot nga molutaw ug makalahutay sa kasamtangang kaguliyang taliwala sa daghang wala makaantos ug nanira. Samtang, daghan pang pangutana kanus-a molurang ang mala-purgaturyong kahimtang sa industriya sa media.
Kini ang hagit sa Superbalita karon ug umaabot. Apan pinaagi sa inyong pagpalit ning mantalaan ug makanunayong suporta sa mantalaan, seguradong mobarog kitang madaugon.