Let’s make it clear

Sus, puwerte nakong kuganga sa gibuhat nu Gabby nako. Mikurog ang tibuok kong lawas sa iyang paggakos ug paghawok nako. Morag toro nga kabaw si Gabby nga naghuramentado. Bisag diin na lang siya manghikap sa akong lawas.

Sa akong kalagot, gitukmod ko si Gabby.

“Ingon diay ka ani? Gipahigalam lang ko nimo aron mosalig ko nimo?”

“Ayaw na lang pagpakipot, uy! Nakagusto ka sab sa akong gibuhat.”

Nakahilak ko. Pagkaubos diay sa pagtan-aw ni Gabby sa akong pagka babaye. Giisip gyud diay ko niyang usa ka playgirl.

“Salbahis ka, Gabby! Di ko daotang pagka babaye, uy!”

“Magpakaaron-ingnon pa gyud ka, da. Gusto ka man ganig daghag uyab unya nasuko kunohay ka sa akong gibuhat nimo karon?”

Wa na gyud ko kapugong sa akong kalagot. Natamparosan ko si Gabby. Nagdali kong mitindog ug gibiyaan ko siya sa sulod sa sinehan. Hapit nagbuntag kong naghilak sa akong kasuko kang Gabby. Pagka ugma gitawgan ko ang akong cousin, si Tessie, ug gisugilon ko niya ang tanan.

“Na, ikaw ra gyuy mabasol ana, Gaw. Nagtuo gyud si Gabby nga playgirl ka kay bisag duna ka nay uyab, gisugot gihapon nimo siya.”

“Paita sab diay sa bugti sa akong pagtraydor ni Arnel, uy, Gaw.”

“Unya mousab ka pa? Maayo gani kay wa gyud ka mabiktima sa kasalbahis ni Gabby. Wa gyud niya makuha ang iyang gusto diha nimo.”

“Pagtulun-an na nako ang nahitabo, Gaw.” “Maayo kay nakat-on ka na, Gaw.”

Anang pagka Sunday nagduwa kog golf. Napasagdan ko ang maong sports tungod sa pagpakigrelasyon ko sa duha ka lalaki.

“Unsay imong plano ron, Gaw?” Igo ko lang gipasiplatan si Tessie. Namauli na mi niadtong tungora.

“Di diay maayo nga magbaton og daghang uyab, Gaw. Makagaba diay kini.” “Husto gyud ka, Gaw.” Sa pagpanglabay sa mga adlaw nasuta ko sa akong kaugalingon nga true love ang gibati ko kang Arnel. Namisita na sab si Arnel nako ug misugilon nga tinuod gyud ang iyang paghigugma nako. Gisuginlan ko sab siya nga nagbuwag na mi si Gabby ug siya na lang ang akong higugmaon.Malipayon na kaming duha sa among panaghigugmaay.

(KATAPUSAN)