Salamin sa kawad-on og kakabus

Sa kadaghang higayon naprubahan na nga dakong palpak ang mga pamaagi sa pagsulbad sa gobiyerno niining mga tawo nga gitawag og street dwellers o kanang mga tawo nga anaa ra intawon manimuyo sa daplin sa kadalanan. Nag-antos intawon sila sa kabugnaw sa panahon, uwan ug init.

Si Department of the Interior and Local Government (DILG) undersecretary Martin Dino mihulga nga panakpon kining maong mga tawo gumikan kay nakahatag og buling sa atong katilingban. Sama sa pagpanghudlat o gulpe de gulat kining pamahayag ni Dino nga gustong panakpon ang mga makililimus ug tanang katawhan nga way puluy-anan sa atong katilingban.

Panghudlat nga morag kinutlo ra niya sa buhok sa iyang ilong sa walay pagtuon kon unsa ka komplikado ug kalawom nga isyo ning kakabus sa katawhan.

Nagpaila lang kini nga niay mga opisyal nga walay paghuna-huna nga momandar og dako og silot sa nga kabus nga magbagdoybagdoy sa kadalanan.

Niadtong miaging semana, gilusad sa kagamhanan ning dakbayan sa Sugbo ang ‘rescue operation’ ning mga tawo. Dili dakop ang termino. kon dili rescue. Gipanghipos sila ug gipahimutang sa mas desente o luwas nga lugar. Ang uban, matod pa, gastuhan sa kagamhanan aron papaulion sa ilang mga probinsiya diin sila gikan. Kasagaran ani kanila gikan sa probinsiya ug nanimpalad lang dinhi sa dakbayan dala ang pagtuo nga ania dinhi ang buhilaman.

Hulagway kini sa kakabus. Dugay na kining maong problema nga mihamok sa atong katilingban ug sa bisan asang mga dagkong siyudad o nasud, anaa gyud ning maong problema. Mahipos man tuod kini sila, apan dili madugay mobalik lang gihapon kay naa man ang ilang kinabuhi diha. Hangtod asa o kanus-a mahatagan og kasulbaran kining maong problema nga mao ang salamin sa kawad-on ug kalabus?

(bobbygnalzaro@ gmail.com)