Hangupa ang katiguwangon

Di angay ikauwaw o ikaguol ang nagkadaghan nga uban sa buhok o kunot sa panit kay ang pagsaka sa edad usa ka pribilihiyo ug gasa nga di mapalit, mapangayo o ikabaylo.

Gani, ang kunot sa agtang ug aping pahinumdom sa atong mga maanindot, malipayon ug tam-is nga kagahapon.

Ang mga higala nako nga naguna sa duyan mipaambit og mga sikreto pataas sa kinabuhi.

Labing una nilang tambag mao ang paglikay sa pag-inom og softdrinks kay mao kini makaingon sa mga sakit-sakit sama sa tumang pagpanambok (obesity), Type 2 diabetes, sakit sa kasin-kasing, cancer ug uban pa.

Hinuon, mitambag sila pagkaon og daghang nuts sama sa mani kay duna kini mga nutrients ug minerals sama sa Magnesium, Vit E og Selenium nga makapabaid sa utok ug palayo sa mga sakitsakit.

Angay sab minus-minusan ang pagkaon og junk food kay taas kini og sodium ug kamay. Hinuon mas maayong moinum og kape kay daghan kini og antioxidants nga mobatok sa Parkinsons ug Alzheimers diseases.

Kaon sab og daghang isda kay taas kini og protina ug healthy fats (Omega-3 fatty acids) nga makatabang paglikay sa sakit nga depresyon ug dementia (tumang pagkamalimtanon). Daghanon sab ang pagkaon og mga utanon, lagutmon og prutas kay daghan kini og bitamina ug mineral nga natural nga tambal sa lawas.

Pahuway og katulog og insakto. Ang kakuwang ini maoy makaingon sa pagka-iritabli, libog nga panghuna-huna, sakit sa kasingkasing, diabetes ug makapaminus sa resitensiya batok sa mga sakitsakit.

Paggamit og daghang klasing lamas kay gawas nga makapalami kini sa niluto, daghan sab kini og sangkap nga tambal sa lawas.

Undangi na ang pagpanigarilyo kay numero uno kining makapauga sa panit, makaingon sa cancer ug sakit sa kasingkasing.

Ayaw kalimti ang pag-ehersisyo kay kini makapahimsog sa imong baga ug kasingkasing. Hinumdumi kada adlaw duna tay 1,140 ka minuto nga maghatag og bag-ong posibilidad ug oportunidad para padayong himsog ug malipayon ang pagpuyo uban sa mga minahal.