Nagtanom og laing kahadlok

Mikunop na unta ang Covid-19 nagtanom na sab og kahadlok ang laing variant gikan sa UK of Great Britain. Gikaluhaan sa pandemic sa kahadlok.

Ang UK ulahi nga nag-lockdown sa paghugpa sa Covid-19. Diha na molihok nga nagpositibo si British Prime Minister Boris Johnson.

Pagtumaw sa bag-ong variant giistrikto ang lockdown.

Mitapon sa 41 ka mga nasod hinungdan sa pagpatuman og travel ban. Dunay lalaking overseas Filipino worker (OFW) positibo gikan sa Dubai, United Arab Emirates (UAE) nga taga Kamuning, Quezon City.

Si Pres. Rodrigo Duterte mipasidaan nga kon mamatikdan dinhi sa nasod ang maong matang sa virus posibilidad nga ipaubos sa laing hugna sa lockdown.

Delikado ang maong virus nga daling makatakod. Gikanselar ang pilot implementation sa limited face-to-face classes sa mga piniling lugar nga sugdan unta sa Enero 1123. Wala pa gani moabot ang bakuna o wala pa matino kon motakdo ba sa balatian gihulga na sab sa UK variant.

Baruganan ni Duterte nga dili i-renew ang Visiting Forces Agreement (VFA) kon dili dayon makahatag ang Amerika og 20 milyun doses sa nadiskobring bakuna sa Pfizer.

Wala pay giaprobahan sa Food and Drugs Administration (FDA) gawas sa Pfizer-US. Unsang pagkaunsaa nga gitusokan na sa bakuna ang pipila ka mga sakop sa Presidential Security Group (PSG) ug kabinete nga mahal ra ba ang vial sa Sinopharm-China. Kinsay nagbayad sa maong palusot?

Subay niini, si Vice Pres. Leni Robredo misalida nga angay manubag ang administrasyon. Apan gidepensaan sa Malacañang ug gihulagway nga ang gibuhat sa PSG usa ka tawag sa kaakohan isip lunodpatay nga nanalipod sa panglawas sa presidente. Nahilom ang inbestigasyon sa Department of Justice, National Bureau of Investigation, FDA ug Senado.

Nipasidaan si Duterte sa Senado nga dili ipa-contempt ang PSG kon dili motambong sa pagpatawag sa Senado.