Atake sa kasingkasing namatyan ni Addy Sitoy

Nipailawom og dinaliang angioplasty mga upat ka adlaw ang nakalabay si Secretary Adelino “Addy” Sitoy sa Cebu Doctor’s University Hospital sa Dakbayan sa Sugbo human makaplagi nga 99 porsyento sa wala nga bahin sa iyang kasingkasing barado na.

Maayo na unta ang gipamati sa opisyal pipila ka mga adlaw human sa operasyon nga gihulagway nga malampuson, apan samtang nakigsulti siya sa iyang cardiologist sulod sa recovery room mga alas 5 sa hapon sa

Huwebes, kalit kining giatake sa kasingkasing ug wa na matabang pa sulod sa tambalanan.

Mao kini ang giasoy ni Lapu-Lapu City Vice Mayor Celedonio “Celsi” Sitoy, igsuon ni Addy, sa interbyu sa Superbalita Cebu sa Biyernes, Abril 16, 2021.

“Sakit gyud kaayo kay kalit ra, wa damha,” matod ni Bise Mayor Sitoy.

Kagabii, Abril 16, gibutyag sa bise mayor sa Superbalita Cebu nga positibo sa kagaw sa Covid ang lawas sa kalihim nga gipailawom sa test.

“Three days ago (gi-angioplasty). Unya okay na ang tanan kay magkaestorya na man mi twice a day,” asoy sa bise mayor mao nga nakalitan kaayo sila sa kalit nga kamatayon sa kalihim.

Iya usab nga gibutyag nga sa uwahing bahin sa Marso, nagpositibo sa Sars-CoV-2, kagaw nga nagdala sa coronavirus disease 2019 (Covid-19) ang iyang maguwang, apan naulian ug nakagawas ra sa Cebu Doctors University Hospital human sa 14 ka adlaw.

Niasoy ang bise mayor nga sa uwahing bahin niadtong Marso, samtang didto sa Manila si Addy kuyog sa iyang ka mga staff, ang usa niini nagpositibo sa kagaw sa Covid-19.

Busa sa ilang pag-uli, nagpa-swab test sila ug ang kalihim mao ray nagpositibo sa Covid-19.

Ilang nahukman nga i-admit si Addy sa CDHU aron maatiman pag-ayo.

Human sa 14 ka adlaw, gipailawom siya sa swab test ug nigawas nga negatibo busa niuli kini sa ilang balay sa Cordova.

Paglabay sa pipila ka adlaw, nagmulo kini sa kasakit sa dughan, busa nagpahiling sa doktor ug didto nahibaw-an nga barado na ang wala nga bahin iyang sa kasingkasing.

Gidali dayon ang pag-perform sa angioplasty.

MODAGAN UNTA

Gitug-an sa bise mayor nga ang iyang maguwang nagplano unta sa pagdagan sa pagka kongresista sa lone district sa Dakbayan sa Lapu-Lapu.

Plano sa kalihim nga kon siya modaug, iyang paninguhaon nga mamahimong lahi nga lalawigan ang isla sa Mactan nga gilangkuban sa Dakbayan sa Lapu-Lapu ug lungsod sa Cordova nga dugay na niyang giplano.