Asoy sa mitaliwan na
Pipila ka mga adlaw sa wa pa siya mabugtoi sa kinabuhi, si Sydney Rose Panimdim, 37, nagsuwat sa iyang pag-ampo kang Birhen Maria, nga siya tabangan nga malugwayan pa ang iyang kinabuhi.
Sa iyang suwat nga ang kopya nakita sa Superbalita Cebu, si Sydney Rose nangamuyo kang Birhen Maria nga hatagan pa siya og dugang mga adlaw sa iyang kinabuhi ug mawagtang ang iyang hubak.
Sa iyang suwat, ang labing grabe niyang nasinati sa kalisod sa pagginhawa nahitabo niadtong gabii sa Abril 6, 2021.
“Sana Mama Mary pakinggan nyo ang hiling ko nga mawala na yung sakit nga hubak,” tipik sa suwat ni Sydney Rose. Matod niya nga diriyot na siya mamatay sa alas 10 sa gabii sa mao nga adlaw kay naglisod na siya og maayo sa pagginhawa. Si Sydney Rose namatay niadtong Abril 11 sa gabii tungod sa grabeng atake sa hubak.
Ang iyang death certificate nagpakita nga siya namatay sa status asthmaticus.
Ang status asthmaticus usa ka klase sa hubak nga di na mopatuo og bisan tradisyunal nga tambal sama sa inhaled bronchodilators.
Sa samang suwat, si Sydney Rose niingon nga kon unsa man, kon pagbuot sa Ginuo, iya na lang kining dawaton.
“First time nako nga grabe nga nag-ingon ato ka grabe kaayo kakutas tungod sa akong hubak, nakaingon ko sa akong kaugalingon kon anhi ra jud kutob ang akong kinabuhi, inyong gihatag nakong kinabuhi, dawaton na lang nako. Wa na koy mahimo kay hinuwaman nako akong kinabuhi,” matod ni Sydney Rose sa iyang suwat.
Iyang gipasalamatan si Birhen Maria sa iyang gitawag nga “ikaduhang kinabuhi” human maka-survive.
Ang kamatayon ni Sydney Rose giimbestigar sa Department of Health (DOH) 7 tungod sa alegasyon sa iyang pamilya nga nibalik ang hubak niini human mabukanahi sa unang dose sa bakuna batok sa Sars-CoV-2, kagaw nga nagdala sa coronavirus disease 2019 (Covid-19).
Nisamot kini human madapati sa ikaduhang dose niadtong Abril 9, 2021.
Matod sa usa ka tinubdan nga kauban niya sa samang tambalanan diin siya nagtrabaho, si Sydney Rose wa mosulti sa iyang gihambin nga sakit human sa unang dose.