Yesterday once more

Daghan pa mig giestoryahang upat. Imagine after more than two years, karon pa mi magkita.

“Nganong nagkakuyog man mo karon si Mayeth, Carl?”

Namatikdan nako nga namuwa ang nawong nila ni Carlo ug Mayeth. Wa tingali sila magtuo nga ikapangutana ko kini. Mikatawa si Carlo.

“Well, ang university nga akong gibalhinan mao sab diay ang gieskwelahan ni Mayeth. Nagkakita mi sa eskol. Ug kay daan na ming friend sa atong pagtungha sa hayiskol sa lungsod sa Sogod, maong kanunay ming magkuyog. Siyempre, nalipay ko kay wa pa man koy mga friends sa eskwelahan.”

Miyangu-yango ko. Nagtug-anay mi koin haing university mi nagtungha.

Nagdungan mi sa paggawas sa fast food dihang nakahuman na mig pangaon. Unya nagkabuwag na mi sa pagpanglakaw. Mikupot si Samuel sa akong kamot. Nakakita si Carlo ug Mayeth sa gibuhat ni Samuel.

Ambot ba nga mora mag namuwa ang akong nawong.

Giagbayan ko ni Samuel dihang namaingon mi sa Cebu Cathedral. Every Sunday sa hapon manimba gyud mi.

“Unsay imong gibati karon, Sam, nga nagkita mo si Mayeth?”

Nakita ko nga nagblush ang nawong sa akong boyfriend. Nahikatawa na lang siya ug nagpanglingo.

“Well, nalipay ko pero kutob na lang diha. Wa na koy laing gibati aside from that. Cleof.”

“Sure ka nga wa na kay laing gibati ngadto kang Mayeth?”

“Sure ko, Cleofy. ikaw, unsa man say imong gibati pagkakita kang Carlo?”

“Aw, nalipay sab ko, Sam. Pero kutob ra diha, wa na koy laing gibati pa ngadto niya.” “Sure ka nga nagtug-an ka sa tinuod nako?”

“Sure gyud ko, Samuel.”

Unya nagkinataw-anay mi si Samuel. Human sa Santos nga Misa nga among gitambongan, namauli na mi si Samuel sa tagsa-tagsa ka boarding house nga among gipuy-an. Wa mi mamauli karon sa lungsod nga among gigikanan bisan weekend. Panagsa ra mi mamauli sa Sogod.

Wa dayon ko makatulog anang pagka gabii. Ang kauban kong tulo ka boaders nga pulos sab mga estudyante, nindot na kaayo ang pagkatulog. Sila si Carlo ug Mayeth ang akong gihunahuna.

(SUMPAYAN)