Odom napurdoy tungod sa sugal

Giangkon sa kanhi National Basketball Association (NBA) star Lamar Odom ang iyang pagkalubog sa utang tungod sa sugal.

Matod sa kanhi sinaligan sa Los Angeles Lakers nga niadtong 2020 nitawag pa siya kang anhing Kobe Bryant aron tabangan siya’g bayad sa iyang mga utang.

Si Odom, 41, nagkanayon nga mao kadto ang iyang uwahing pakigstorya sa iyang kanhi teammate nga si Bryant sa wala pa kini namatay tungod sa helicopter crash.

Tungod kay desperado na siya ug wala na’y lain maduolan gitawagan ni Odom si Bryant aron tabangan siya. Nakadawat og kasaba si Odom gikan kang Bryant apan gitabangan gihapon kini.

Si Bryant ug Odom suod nga managhigala ug nag-uban sila sa Lakers niadtong 2004 ngadto 2011 ug nidaog sila og duha ka championships sa 2009 ug 2010 kauban sila si Pau Gasol ug Derek Fisher.

Sa iyang 14 ka mga tuig sa NBA, nikita sa Odom og dulan sa $100 milyones o P5 bilyones apan nalambigit pud kini og daghang bisyo sama sa drug addiction ug sugal.

Mitapos si Odom sa iyang playing career nga adunay 12,781 puntos, 8,059 rebounds ug 3,554 assists lakip na ang duha ka championship sa Lakers, gold medal sa 2010 Fiba World Championship ug bronze medal sa 2004 Athens Olympics

Nakasulod si Odom sa NBA niadtong 1999 isip fourth overall pick sa Los Angeles Clippers. Na trade kini sa Miami Heat niadtong 2003.

Gikuha si Odom sa Lakers sa tuig 2004 ug didto kini misulbong og maayo kauban si Bryant.

Niadtong Oktubre 2015 hapit mamatay si Odom sa Las Vegas, Nevada tungod sa drug overdose, na-stroke kini, na-heart attack ug na-coma.