SORRY: RENDELL
• One-hand free throw player nangayo og pasaylo • Lapu-Lapu gustong mokampyon sa VisMin Super Cup
Nangayo og pasaylo ang Sugboanong si Rendell Senining sa iyang aksyon sulod sa korte apan giklaro niini nga wala siya malambigit og game-fixing o point shaving sa Chooks-To-Go 2021 Pilipinas VisMin Super Cup.
Ang 25 anyos nga sakop sa ARQ Builders-Lapu Lapu City Heroes nag-viral sa social media human makita sa video clips nga miitsa kini og free throw gamit ang usa lang ka kamot, premiro sa iyang wa dayon sa iyang tuo batok sa Siquijor Mystics niadtong Abril 14, 2021 sa Alcantara Civic Center sa Lungsod sa Alcantara, Cebu.
Nahimong kontrobersiyal ang maong duwa tungod sa pasangil nga game fixing diin ang duha ka teams mipasulod lang og upat sa ilang 29 ka hiniusang free throws.
Gihukman sa liga nga hatagan og life time ban ang Mystics ug tanang mga miyembro niini samtang suspensiyon ug multa ang gipahamtang sa unom ka players sa Heroes lakip na ang ilang coaching staff.
Tungod sa gibuhat nga free throw ni Senining, siya ang nag-viral og maayo sa social media ug daghan ang mi-react sa gibuhat niini.
Gisuspenso si Senining sa karon nga season ug gipamulta’g P15,000.
Apan giklaro ni Senining sa interbiyu niya sa Breaking by Mikee nga nadala ra siya sa iyang emosyon tungod sa gibuhat sa players sa Mystics.
Pasabot ni Senining nga nahibulong siya sa lihok sa Siquijor players nga daw gipasagdan niini nga makapuntos ang Heroes. Sigon pa ni Senining nga na-offend siya sa gibuhat sa Mystics ug didto na-trigger ang iyang askiyon.
“They were really trying to let us score. It was very unusual for me. It was fishy,” padayag ni
Senining. “Our gameplan was to have a strong start but iba ang nangyari. They just let us score. It’s disrespectful to the game and we got offended. Kung ano man ang sinerve nila sa amin, we just served it back to them.”
Ang team owner sa Heroes nga si Jason Arquisola mipadayag nga sa sugod pa lang sa duwa klaro na nga ang ilang kontra walay intensiyon nga mo-compete.
Matod niya nga ang mga players sa Siquijor gusto nga pa-iskoron ang ARQ Builders og dako.
Mokidhat pa daw kuno sa bench ang Siquijor players kon mosipyat kini sa ilang free throws ug shots.
Giangkon ni Arquisola nga aduna untay laing pamaagi sa pag-handle sa maong sitwasyon.
Ang tinguha karon sa Heroes mao ang pagdaog sa titulo bisan pa man sa mga hagit nga ilang naagian. Niadtong tungora, ang Heroes adunay perpektong 2-0 nga baraha samtang ang Siquijor adunay 1-1 nga rekord. Ang ubang sakop sa Heroes nga gisuspenso hangtod sa first round ug gipamulta’g P15,000 mao sila si Jercules Tangkay, Reed Juntilla, Monbert Arong, Don Henry Cochea ug Ferdinand Lusdoc. /