Epekto sa checkpoint

Sa public perception, kon basehan ang mga post sa social media, mas gidayeg man ang bike lane sa Dakbayan sa Mandaue kay sa Cebu City. But kon akong basehan ang gitas-on ug kadaghan sa mga karsadang nabutangan og bike lanes, mas taas baya ang Cebu City. Ingon pang Atty. Gerry Carillo, moabot og 100 ka kilometro ang bike loop sa Cebu City.

Ang bike lane nga tulo ka kilometro ang gitas-on ug 10 metros ang gilapdon nga naa daplin sa Cebu South Coastal Road padayong gitrabaho. Kon mahuman na, luwas nang biseklitahan ang CSCR. Maayo usab unta kon mo-lobby si Mayor Samsam Gullas sa Dept. of Public Works and Highways (DPWH) nga sumpayan ang bike lane sa Cebu City lahos sa may tumoy sa CSCR. Kana nga katas-on sa karsada maghatag og luwas nga pagsikad, labina sa mga tawo nga mag bike to work.

Kon kini mahitabo, naa na unya kitay ikapasigarbong lapad nga bike lane sama sa Dakbayan sa Iloilo nga luwas nga masikaran. Mas nindot pa kon masumpay kini ngadto sa ikatulong taytayan sa Mactan nga magsukad sa Cebu City tabok sa Cordova.

Kon gusto kong mobiseklita, di na ko moadto pag laing lugar, akong subayon ang rota. Kon moabot ni og 10 kilometros puhon, kana kon makasumpay ang Dakbayan sa Talisay, kaanindot.

TCH CHECKPOINT

Nalipay kong nakakita sa checkpoint sa Traffic Unit sa Cebu City Police Office (CCPO) ug traffic enforcers sa Cebu City Transportation Office (CCTO), kansang buhatan gipangulohan ni Lyntoni Alburo. Ang CCPO misaad nga ila nang kanunayon ang pagbutang og checkpoint sa dapit, labina sa weekends.

Sukad nagsige na og checkpoint sa TCH, wa na ko kabantay nga duna pay nanguhag mga hulagway. Naluoy baya kong naghuna-huna sa mga photographer nga naangin sa mga kaskasero nga riders ug drivers. Tipik baya intawon na

sa ilang panginabuhi karong panahuna nga minos kaayo ang mga kalihukan tungod sa pandemic.

Wa sila bayri sa ilang pagpanguhag mga hulagway sa TCH, apan tungod ani, nakakita silag mga kliyente sa lainlaing mga kalihukan. Nahimo intawon kining exposure nila.

Unsay tinud-anay nga makapatay sa karsada, labina sa TCH? Ang abusado man nga drivers. Kinsay kusog tigpadagan diha? Di lang motorsiklo, apil na ang mga van-for-hire. Nakahibawo ko kay maghatdanan baya ko sa akong asawa sa GMA-7. Diri gani abusado na silang makapadagan, samot na sa TCH.

Maayo untag mabadlong na sila sa mga awtoridad.

GIPANG-AYO

Niadtong miaging Dominggo, nakahigayon kog sikad sa ubang bahin sa kabungtoran sa Consolacion. Akong naagian ang pipila ka mga karsada nga gisugdan na og ayo.

Ka makaluluoy sa mga tagiya og sakyanan nga kanunay moagi sa mga dapit nga akoang giagian. Kay sa akong tan-aw, ka hinay sa pagtrabaho nila sa karsada.

Hinaut pa untang mapaspasan ang pag-ayo samtang wa pa moabot ang ting-uwan. Hinaut usab unta nga butangan kini og igo ug maayo nga drainage. Mas dugay maguba ang dan.