Yesterday once more

Mihunong ko paglakaw. Di ko kauban karon si Samuel kay duna siyay lain nga giadto. Usually gud magkuyog man gyud mi gikan sa eskuwelahan inig gawas namo. Ihatod gyud ko sa akong boyfriend sa balay.

Nindot kaayog smile si Carlo nga diha na sa akong atubangan.

“Kining, Cleof, nagdali ka ba sa pagpauli? Imbitaron unta tikag esnak diha.”

Usa ka fast food ang gitudlo ni Carlo. Naghunahuna ko. Wa man say daotan kon mosanong ko sa imbitasyon sa akong ex-boyfriend?

“Wa man ko magdali, Carl. O, sige. Pero di lang ta magdugay.”

Mitando si Carlo. Dihang nag-atubang na mi si Carlo sa sulod sa fast food ug nag-esnak na, namatikdan nako nga magsige siyag tutok nako. “Unsa may imong tuyo nako, Carlo?” Di ko komportable sa tinan-awan ni Carlo nako.

“Gusto lang kong magkaestorya ta nga kita rang duha, Cleof. You know, nag-atang ko nimo sa gawas sa gate sa imong gieskuwelahan. Nalipay ko kay ikaw rang usa.”

“Dunay importante nga giadto si Samuel Unsa may atong estoryahan?” Miginhawa pag-ayo si Carlo. Naghuwat ko sa iyang isulti. Ambot ba sab, uy, nga gikulbaan man ko?

“Sa didto na ko sa Bohol, motuo kag di, mahunahuna tika kanunay.”

Mikatawa ko. Seryuso si Carlo.

“Sus, kadaghang guwapa didto sa Bohol unya ako ra kaha ang imong mahunahuna?”

“That’s true, Cleof. I admit, ako ang problema sa atong relasyon kaniadto. Kanunay tikang awayon tungod sa akong pagka seloso. Apan normal man lang kini sa tawo nga mibatig true love.”

“Di na nato kana hisgotan, uy, Carlo. Duna na koy uyab, ug ikaw uyab na sab nimo si Mayeth.”

“Ha? Kinsa gud intawon ang nag-ingon nimo nga uyab nakos Mayeth? Wa mi relasyon gawas lang sa among pagka friend. Puyde pa ba kong mangulitawo nimo, Cleof ? Until now ikaw gihapon ang akong love.” Nakalitan gyud ko sa akong nadungog. “Uyab ko na si Samuel. Ug nakahibawo ka na ani, Carl.”

Unya giagda ko na si Carlo nga manggawas na mi sa fast food.

(SUMPAYAN)